शिक्षा नियमावली विपरित संस्थागत विद्यालयलाई स्थानान्तरण अनुमति

महेन्द्रनगर – गत चैत्र १९ गते विहिबार बसेको भीमदत्त नगरपालिको कार्यपालिका बैठकले नगरपालिकाको शिक्षा नियमावली २०७९ विपरित निर्णय गरेको छ । कार्यपालिकाको उक्त बैठकले भीमदत्तको शिक्षा नियमावली २०७९ को नियम १६ को उप नियम ४ विपरित एक संस्थागत विद्यालयललाई स्थानान्तरण गर्ने निर्णय गरेको हो ।

कार्यपालिकाले भीमदत्त नगरपालिका वडा नं. १८ मा कार्यालय रहेको माईलस्टोन पब्लिक एकेडेमी(प्रस्तावित नाम आध्या स्कूल)लाई भीमदत्त नगरपालिका वडा नं. ३ जगदनाथ टोलस्थीत फारवेस्ट स्कूल अफ मेडिसिनको भाडाको घरमा स्थानान्तरणका लागि अनुमति प्रदान गरेको छ । नगरपालिकाको शिक्षा नियमावली २०७९ को नियम १६ को उप नियम ४ मा ‘सामान्यतया संस्थागत विद्यालय स्थानान्तरण गरीने छैन । तर विद्यालयको आफ्नै नाममा घरजग्गा भएको अवस्थामा भने एक पटकका लागि सम्बन्धीत स्थानीय निकाय तथा वडाको सिफारिसमा अन्य स्थानीय तहबाट यस नगरपालिकामा र यस नगरपालिकाको एक वडाबाट अर्को वडामा नगर शिक्षा समितिले निर्धारण गरेको मापदण्ड बमोजिम नगर शिक्षा समितिले स्थानान्तरण गर्न सकिनेछ’ भनि उल्लेख गरीएको छ ।

नगर शिक्षा नियमावलीका अनुसार विशेष अवस्थामा मात्रै संस्थागत विद्यालयको स्थानान्तरण एक पटकका लागि गर्न सकिने र त्यो विशेष अवस्था भनेको विद्यालयको आफ्नै नाममा घरजग्गा खरिद गरेको हुनुपर्ने हो । तर आध्या स्कूलको नाममा जग्गा र घर रहेको प्रमाण नगरपालिकासंग छैन् ।
उक्त विद्यालयको डकुमेन्टको आधारमा स्थानान्तरण गर्ने प्रक्रिया नगर शिक्षा शाखाबाटै स्थगित हुनुपर्ने हो । भीमदत्त नगरपालिका वडा नं. १८ ले सिफारिस निवेदनमै के उल्लेख गरीएको छ भने माईलस्टोन एकेडेमी भीमदत्त नगरपालिका वडा नं. ३ स्थित नेत्रराज चटौतको घरमा सरेकाले सोहि बमोजिम ठाँउसारीका लागि निवेदन पेश गरेकाले ठाँउसारीका लागि सिफारिस गरीएको उल्लेख गरीएको छ । उक्त सिफारिसका अनुसार विद्यालयको आफ्नो नाममा घरजग्गा नभएको स्पष्ट जनाउछ । यति हुदाहुदै पनि नगरशिक्षा समितिले उक्त प्रस्ताव नगर कार्यपालिकामा पेश गरी पास गराएको देखिन्छ ।

भाँसीस्थित फारवेष्ट स्कुल अफ मेडिसिनको भवन भाडामा लिएर विद्यालय सञ्चालन गर्न खोजिएको छ । विद्यालय र क्याम्पसबीच भाडा सम्बन्धि सम्झौता गरिएको छ । यो क्याम्पस भवन इन्टरनेशनल पब्लिक स्कुलसित जोडिएको छ । इन्टरनेशनल पब्लिक स्कुलसित जोडेर आध्या विद्यालय सञ्चालन गर्ने तयारी गरिएको छ ।
आध्या स्कूल स्थानान्तरण विषय शिक्षा नियमावली विपरीत शिक्षा समितिमा छलफल नै नगरी कार्यपालिकाबाट पास गराईएको विषयबारे संस्थाागत विद्यालयहरुका छातासंगठन प्याब्सन कञ्चनपुर जिल्ला कार्यसमिति लगायत संगठनहरुले संयुक्तरुपमा नगरपालिकालाई निवेदन दिएका छन् । उनीहरुले उक्त विषयमा चासो राख्दै यदी उक्त विषय मिडियामा आए जस्तै साचो भए घोर विरोज समेत जनाएका छन् । तर पनि यस विषयमा नगरपालिका भने मौन छ ।

भीमदत्त नगरपालिका वडा नं. १८ जानकीटोलमा संञ्चालन गर्ने गरी २०६६ मा स्थापना गरीएको ध्रुव विद्या निकेतन २०७३ मा नाम परिवर्तन गरी माईलस्टोन पब्लिक एकेडेमी राखिएको छ । भने उक्त एकेडेमी लामोसयम देखि बन्द रहेको छ । अहिले यसको नाम र ठेगाना परिवर्तन गरी संञ्चालन गर्न लागिएको छ । यस प्रालिको नियमावलीमा ७ सदस्यीय संञ्चालन समिति रहने व्यवस्था रहेको छ ।