संविधान दिवसको पूर्वसन्ध्यामा मन्त्रालय परिसर तथा मुख्यमन्त्री निवास वरपर सरसफाई

धनगढी – सुदूरपश्चिम प्रदेशको भौतिक पूर्वाधार विकास मन्त्रालयले संविधान दिवसको पूर्वसन्ध्यामा मन्त्रालय परिसर तथा मुख्यमन्त्री निवास वरपर सरसफाई गरेको छ । शुक्रबार मन्त्रालयले मन्त्रालय परिसर, मुख्यमन्त्री निवास वरपर रहेको झाडी तथा फोहोर सरसफाई गरेको हो ।

भौतिक पूर्वाधार विकास मन्त्रालयको अगुवाइमा गरिएको सरसफाई कार्यक्रममा सुदूरपश्चिम प्रदेशका मुख्यमन्त्री खगराज भट्ट, भौतिक पूर्वाधार विकासमन्त्री ओमविक्रम भाट(सरल), राज्यमन्त्री जानकीदेवी कुँवरको सहभागिता रहेको थियो ।

सरसफाईमा सहभागी मुख्यमन्त्री भट्टले जनताको सेवा गर्ने कार्यालय कार्य सम्पादनका दृष्टिले मात्र नभइ आँखाले देखिने, कानले सुनिने तथा जनताले महसुस गर्ने हुनुपर्ने बताए ।

उनले भने ‘यहाँको झाडी हेर्दा सरकारी कार्यालय हो की,मसानघाट हो भन्ने अवस्था बनेको छ । यस्तो हुनु हुँदैन् ।’ त्यस्तै,मुख्यमन्त्री भट्टले नेपालको संविधान २०७२ जनताको अभूतपूर्व वलिदान,राष्ट्रिय सहमतिको जगमा शान्ति, अग्रगमन, लोकतन्त्रको सर्वोत्तम संस्लेषणका रुपमा निर्माण गरिएको बताए ।

उनले संविधानले राजनीतिक फोहर मिल्काउने तथा जनताको सर्वोच्चता स्थापित गर्ने गरेको उल्लेख गर्दै व्यवस्था परिवर्तन भएपनि जनताको अवस्था परिवर्तन नभएकोले प्रदेश सरकार अवस्था परिवर्तनको अभियानमा लागेको बताए ।

भौतिक पूर्वाधार विकासमन्त्री भाटले सेवाग्राही आउँदा मन्त्रालय परिसरमा बस्ने ठाउँ नभएकाले गार्डेन निर्माण गर्ने उदेश्यले सरसफाई गरिएको बताए ।

उनले भने ‘गत वर्षको जेनजी आन्दोलनमा मन्त्रालय भवन जलेको छ । अहिले मन्त्रालय राखिएको ठाउँमा सेवाग्राहीलाई बस्ने ठाउँ छैन् । बाहिर बस्दा लामखुट्टेले टोक्ने,सर्पको डर हुने अवस्था छ । यसलाई व्यवस्थित गर्नका लागि यो सरसफाई गरिएको हो ।’ उनले सरसफाई गरिएको क्षेत्रमा धनगढी उपमहानगरपालिकाले गार्डेन बनाउने बताए ।

राज्यमन्त्री कुँवरले सरसफाई कार्यक्रमले आफ्नो ठाउँ,टोल आफै बनाउनुपर्छ भन्ने सन्देश दिन खोजिएको बताइन् । उनले सरसफाई युवाको उल्लेख्य सहभागिता रहेकाले अहिलेको सरकारसँग युवाहरुले केही अपेक्षा गरेको बताइन् । सरसफाई मन्त्रालयका कर्मचारी,स्थानीय युवालगायत २ सय जनाको
सहभागिता रहेको थियो ।