सुदूरपश्चिमको मौलिक स्वाद प्रवर्द्धन गर्न ‘सुप थाली’ सार्वजनिक

कञ्चनपुर – सुदूरपश्चिमको मौलिक, अर्गानिक तथा परम्परागत खानपानलाई राष्ट्रियस्तरमा चिनाउने उद्देश्यले स्थानीय परिकारयुक्त ‘सुप थाली’ सार्वजनिक गरिएको छ।
कञ्चनपुरको भीमदत्तनगर–३ महेन्द्रनगर स्थित ममताज काजबारले  पत्रकार सम्मेलन गरी सुप थालि सार्वजनिक गरिएको हो । सुप थालीमा बटुक, माणा, डूब्का, फापरको रोटी, गौतानि, भाङको चट्नी लगायतका विभिन्न सुदूरपश्चिमेली परिकार हुने ममताज काजबारका प्रबन्ध निर्देशक धिरज चन्दले बताए ।
नेपाली खानपानको बजारमा थकाली र नेवारी खानाको व्यापक चर्चा भइरहेका बेला सुदूरपश्चिमका ऐतिहासिक तथा सांस्कृतिक परिकारलाई समेत पहिचान दिलाउने उद्देश्यले ‘सुप थाली’ ल्याइएको उनले बताए । प्रबन्धक चन्दले खानालाई पेट भर्ने माध्यम मात्र नबनाई भूगोल, संस्कृति र पहिचानको संवाहकका रूपमा प्रवर्द्धन गर्ने उद्देश्य रहेको उनले जानकारी दिए ।
‘सुप थाली’मा सुदूरपश्चिमको पहिचान बोकेका डुक्का, माडा, फापर तथा कोदोको रोटी, गट्टानी तथा स्थानीय जातका पोपिला गेडागुडी समावेश गरिएको जनाइएको छ।
त्यस्तै, स्वाद र सुगन्धका लागि जिम्बु, टिमुर, भाङको छोप तथा पहाडी तोरीको तेल जस्ता मौलिक मसला तथा सामग्रीको परम्परागत संयोजन गरिएको छ।
थालीमा कृत्रिम रङ तथा हानिकारक रसायनरहित परिकार प्रयोग गरिएको छ। फलाम तथा काँसका भाँडामा परम्परागत विधिबाट पकाइने भएकाले परिकार पौष्टिक र पाचनीय हुने दाबी गरिएको छ।
‘सुपा थाली’लाई सुदूरपश्चिमको खानाको थाली मात्र नभई बझाङ, बाजुरा, दार्चुलादेखि कञ्चनपुरसम्मको पहाडी जनजीवन, संस्कार र आतिथ्य सत्कारको प्रतिनिधित्व गर्ने परिकारका रूपमा प्रस्तुत गरिएको छ।
सुदूरपश्चिमको लुकेको पाककला, संस्कृति र स्वादलाई देश–विदेशमा पुर्‍याउन सुप थालिले महत्त्वपूर्ण भूमिका खेल्ने आशा गरिएको छ ।