दुई पटक वडा सदस्य निर्वाचित डल्लीदेवी कक्षा एकमा भर्ना

Advertisement

महेन्द्रनगर –कञ्चनपुरकी एक जनप्रतिनिधि कक्षा १ मा भर्ना भएकी छिन् । जिल्लाको लालझाडी गाँउपालिका–१ की वडा सदस्य ५२ वर्षीया डल्लीदेवी चौधरी गाउँकै स्वतन्त्र माध्यमिक विद्यालयमा कक्षा १ मा भर्ना भएकी हुन् । उनी नेकपा माओवादी केन्द्रबाट ०७४ र ०७९ मा वडा सदस्यमा निर्वाचित जनप्रतिनिधि हुन ।

सानै उमेरमा विहाबारी गरेकी डल्लीदेवी घरपरिवारको कमजोर आर्थिक अवस्थाका कारण अध्ययन गर्नबाट बञ्चित भईन् । विस २०५२ सालमा विवाह बन्धनमा बाँधिएकी डल्लीदेवीको पढ्ने रहर तिव्र भएपनि घरगृहस्थीमा व्यस्त भएका कारण उनको पढ्ने सपना सपनामै सिमित भयो ।

आफ्नो विगत सम्झैदै डल्लीदेवी आफ्नो कथा यसरी सुनाईन्, ‘म सानै हुँदा बुबा मालिकको घरमा हलिया थिए, आर्थिक अवस्था पनि कमजोर थियो । दैनिक हातमुख जोर्न समस्या थियो,’ उनले भनिन्, ‘मैले माईती घरमा पढ्नै पाइन, त्यसपछि विवाह नै भईहाल्यो, ०७४ को पहिलो निर्वाचनमा वडा सदस्य जितेँ नपढेकै कारण दोस्रोपटक पनि वडा सदस्य नै रोज्नुपर्ने भयो।’
जनप्रतिनिधि भएपछि पढाईको महत्व थाहा पाएको र विद्यालय भर्ना भएको उनी बताउँछिन् । ‘जनप्रतिनिधि भएपछि पढाईको महत्व थाहा पाए,’ उनले भनिन् ‘अव त नपढि छोडिदैन भनेर नै कक्षा एकमा भर्ना भए ।’