गैराबारीको खेतीयोग्य जमिन कटानबाट जोगाउन श्रमदानमा जैविक तटबन्ध निर्माण सुरु

दोधारा चाँदनी – कञ्चनपुर जिल्लाको दोधारा चाँदनी नगरपालिका–८ गैराबारी टोलस्थित नदी किनारमा वर्षाको पानीका कारण भएको कटान नियन्त्रण तथा खेतीयोग्य जमिन संरक्षणका लागि श्रमदानमा जैविक तटबन्ध निर्माण कार्य सुरु गरिएको छ ।

वडा नम्बर ८ का अध्यक्ष ओमप्रकाश रोकायाको नेतृत्वमा सञ्चालन भइरहेको उक्त श्रमदान अभियानमा नगर प्रहरी र स्थानीयको सक्रिय सहभागिता रहेको छ । वर्षायाममा परेको निरन्तर वर्षा र आकाशे पानीको तीव्र बहावका कारण नदी किनारको ठूलो भाग कटान भई स्थानीय किसानहरूको खेतीयोग्य जमिन जोखिममा परेपछि वडा अध्यक्ष रोकायले श्रमदानमा जैविक तटबन्ध निर्माण गर्ने अभियान सञ्चालन गरेका हुन् ।

जैविक तटबन्ध निर्माणमार्फत नदी किनारको माटो कटान नियन्त्रण गर्ने, थप क्षति हुनबाट जोगाउने तथा प्राकृतिक स्रोत–साधनको संरक्षण गर्दै वातावरणमैत्री रूपमा नदी व्यवस्थापन गर्ने उद्देश्य रहेको वडा कार्यालयले जनाएको छ ।
वडा अध्यक्ष रोकायाले स्थानीयवासीको खेतीयोग्य जमिनको संरक्षण वडा कार्यालयको प्रमुख प्राथमिकतामध्ये एक रहेको बताउँदै जोखिमयुक्त स्थानहरूमा आवश्यक संरक्षण कार्यलाई आगामी दिनमा पनि निरन्तरता दिने बताए ।

स्थानीयवासीहरूले समयमै संरक्षणको काम सुरु भएकोमा खुसी भएका छन् । वडाको यस्तो कार्यले नदी कटान रोकिनुका साथै किसानको अमूल्य खेतीयोग्य जमिन संरक्षणमा दीर्घकालीन टेवा पुग्ने अपेक्षा गरिएको छ ।
यस क्षेत्रमा वर्षादमा परेको पानीले जमिन भासिने र भूक्षय हुने गरेको छ ।