भीमदत्तका १८ मावि अन्तर मावि टि-२० प्रतियोगितामा भिड्दै, प्रतियोगिताको उद्घघाटन खेल फ्लोरिडा र आयोजकबीच हुने

महेन्द्रनगर – भीमदत्त नगरपालिका–१० जिमुवास्थित होलीफेम्ली इङ्लिस मिडियम स्कुलको आयोजना तथा भीमदत्त नगरपालिकाको सह आयोजनामा शनिबारदेखि हुने अन्तर माध्यमिक विद्यालयस्तरीय टी–२० क्रिकेट प्रतियोगितामा १८ टिमले प्रतिस्पर्धा गर्ने छन् ।

विद्यालयले बिहीबार ट्रफी अनावरण एबं पत्रकार सम्मेलन गर्दै प्रतियोगितामा नगरपालिका भित्रका ४ सामुदायिक र १४ संस्थागत गरी १८ माध्यमिक विद्यालयले प्रतिस्पर्धा गर्ने जानकारी दिएको हो ।
उद्घाटन खेल शनिबार बिहान साढे ७ बजे फ्लोरिडा र आयोजक टिम बीच हुने सहायक प्रिन्सिपल हरीश ठगुन्नाले जानकारी दिए । दोस्रो खेल दिउँसो ३ बजे लिटिल बुद्ध र रेडियन्ट बीच हुनेछ ।
त्यसै गरी आइतबार बिहान साढे ७ बजे सनराइज भर्सेज महाकाली मोडर्न र दिउँसो ३ बजे लिटिल स्टार भर्सेज ज्ञानोदय पब्लिकको प्रतिस्पर्धा हुनेछ ।
सोमबार मर्निङ भर्सेज वैजनाथ मावि, डाईमण्ड भर्सेज शान्ति निकेतन, इन्टरनेसनल भर्सेज महेन्द्रनगर नमुना मावि, वेस्टर्न भर्सेस लक्ष्मी मावि बीच प्रतिस्पर्धा हुने ठगुन्नाले बताए ।
आयोजकले प्रतियोगिताको सम्पूर्ण तयारी पूरा भएको समेत जानकारी दिएको छ । भीमदत्त नगरपालिकाले ५ लाख सहयोग गरेको छ ।

आयोजकका अनुसार प्रतियोगिता लिग–नकआउट आधारमा सञ्चालन हुनेछ भने खेलहरू आईसीसी र क्यानको नियमअनुसार खेलाइनेछन्। प्रतियोगिताको उद्घाटन नगर उपप्रमुख निलम लेखकले गर्ने कार्यक्रम छ। उद्घाटन खेलमा फ्लोरिडा र आयोजक बीच प्रतिस्पर्धा हुनेछ । खेल शुक्रबारदेखि हुने भनिएता पनि प्रतिकूल मौसमका कारण शनिबार बाट सञ्चालन गर्न लागिएको हो ।

ट्रफी अनावरण कार्यक्रममा विद्यालयका सञ्चालक भुपालसिंह विष्टले विद्यालयस्तरबाटै क्रिकेट प्रतिभा पहिचान र खेलाडी उत्पादन गर्ने उद्देश्यले प्रतियोगिता आयोजना गरिएको बताए ।
त्यसैगरी प्रमुख अतिथि रहेका भीमदत्त नगरपालिका शिक्षा शाखा प्रमुख हरी दत्त जोशीले जिल्लामै अन्तर मावि क्रिकेट प्रतियोगिता पालिकाको पहिलो प्रयास भएकोले सफल भएमा आगामी दिनमा पनि गर्दै जाने बताए ।

स्कूलका प्रिन्सिपल महादेव भट्टले विद्यार्थीहरूमा खेलकुदको विकास, अनुशासन, नेतृत्व विकास, स्वास्थ जीवन शैली र सकारात्मक मार्ग तर्फ प्रेरित गर्नुका साथै समाजमा भाइचारा, सहकार्य एबं प्रतिस्पर्धात्मक भावनाको विकास गर्ने उद्देश्यले प्रतियोगिता आयोजना गरिएको बताए ।
होली फेमिलीका सहायक प्रिन्सिपल हरीश ठगुन्नाले खेलकुदका माध्यमबाट विद्यार्थीमा खेलकुद प्रति चासो बढ्न जाने र प्रतिस्पर्धाको भावना विकास हुने बताए ।

प्रतियोगिताको विजेताले नगद ५१ हजार १ सय ११ रुपैयाँ तथा उपविजेताले ३१ हजार १ सय ११ रुपैयाँसहित ट्रफी, मेडल र प्रमाणपत्र प्राप्त गर्नेछन्। उत्कृष्ट ब्याटर, बलर, फिल्डर, उदयीमान खेलाडी र ‘म्यान अफ द सिरिज’लाई समेत विशेष पुरस्कार प्रदान गरिने आयोजकले जनाएको छ।
प्रतियोगिता जेठ २३ गते समापन गरिने छ । होली फेम्ली ले खेलकुद क्षेत्रमा ठूलो लगानी गर्दै आइरहेको छ ।