नयाँ खबर
कञ्चनपुर – सुदूरपश्चिमको भीमदत्त नगरपालिकामा अन्तर–विद्यालय टी–२० क्रिकेट प्रतियोगिता आयोजना हुने भएको छ । होली फेमली इंग्लिश मिडियम स्कूलको आयोजना तथा भीमदत्त नगरपालिकाको सह–प्रायोजनमा जेठ १४ गतेदेखि प्रतियोगिता सञ्चालन हुने भएको हो ।
विद्यालयका अनुसार प्रतियोगितामा भीमदत्त नगरपालिका भित्रका सामुदायिक तथा संस्थागत माध्यमिक विद्यालयहरूले सहभागिता जनाउन सक्नेछन् । विद्यालयस्तरमै क्रिकेट खेलको विकास, विद्यार्थीमा अनुशासन र नेतृत्व क्षमता अभिवृद्धि तथा खेल संस्कृतिको प्रवर्द्धन गर्ने उद्देश्यले प्रतियोगिता आयोजना गरिएको हो ।
प्रतियोगिता लिग–कम–नकआउट आधारमा सञ्चालन गरिनेछ । प्रत्येक टोलीमा १४ खेलाडी, एक प्रशिक्षक र एक व्यवस्थापक रहने व्यवस्था गरिएको छ । खेल ICC तथा CAN को नियमअनुसार खेलाइने आयोजकले जनाएको छ । प्रतियोगितामा ह्वाइट लेदर बल प्रयोग गरिनेछ ।

प्रतियोगिताको विजेता टोलीले नगद रु ५१ हजार १ सय ११ सहित ट्रफी, मेडल र प्रमाणपत्र प्राप्त गर्नेछ भने उपविजेताले नगद रु ३१ हजार १ सय ११ सहित ट्रफी, मेडल र प्रमाणपत्र प्राप्त गर्नेछन् ।

त्यस्तै, उत्कृष्ट ब्याट्सम्यान, उत्कृष्ट बलर, उत्कृष्ट फिल्डर, म्यान अफ द म्याच, म्यान अफ द सिरिज तथा उदीयमान खेलाडीलाई पनि नगदसहित ट्रफी प्रदान गरिनेछ ।
प्रतियोगितामा सहभागी खेलाडीको उमेर १९ वर्षमुनि हुनुपर्ने व्यवस्था गरिएको छ । खेलाडीको योग्यता पुष्टि गर्न SEE मार्कसिट, IEMIS कोड वा कक्षा ८ को मार्कसिट पेश गर्नुपर्ने आयोजकले जनाएको छ ।

खेलको टाई सेट जेठ १३ गते बुधबार बिहान ८ बजे गरिनेछ भने सहभागी विद्यालयहरूले खेलाडीको विवरण तथा आवश्यक कागजातसहितको आधिकारिक पत्र प्रतियोगिता अघि बुझाउनुपर्नेछ ।
विद्यालय प्रशासनले प्रतियोगिताले विद्यालयस्तरमा क्रिकेटप्रतिको आकर्षण बढाउनुका साथै खेलमार्फत स्वस्थ र सकारात्मक समाज निर्माणमा योगदान पुग्ने विश्वास व्यक्त गरेको छ ।
परशुराम मिडिया प्रालि.द्धारा सञ्चालित नयाँ खवर डटकमले समाचार, विचार, मनोरन्जन, खेल, विश्व, सुचना प्रविधि, भिडियो तथा जीवनका बिभिन्न आयामका समाचार र विश्लेषण समेट्छ । मर्यादित समाज विकास र उन्नतीको पथमा अगाडी बढ्ने उदेश्यका साथ आवाज बिहीनहरुको आवाज बनेर बाहिर प्रस्फुटन हुन नसकेको सत्य तथ्य, निष्पक्ष समाचार संप्रेषण गर्न सधै प्रतिबद्धछौ । भ्रस्टाचार, अनियमितता सम्बन्धी कुनै अडियो भिडियो तपाई संग छ भने हामीलाई उपलब्ध गराउनुहोस र जिम्मेवार नागरिकको दायित्व पुरा गर्नुहोला, श्रोत गोप्य राखिने छ ।