कञ्चनपुर जिल्ला अदालतद्धारा ७० प्रतिशत मुद्धा फछ्यौट, ७ सय ५ मुद्धाको छिनोफानो हुन बाँकि

महेन्द्रनगर – पछिल्ला चार वर्षमा कञ्चनपुर जिल्ला अदालतले मुद्धा फछ्यौटको प्रतिशत बढाएर ७० प्रतिशतमा पु¥याएको छ । चालु आर्थिक वर्ष २०८१।०८२ मा दुई हजार ३ सय ५० मुद्धा फर्छयौट गर्नुपर्नेमा एक हजार ६ सय ४५ मुद्धाको छिनोफानो गरेको हो । नयाँ दर्ता एक हजार तीन सय २१ र जिम्मेवारी सरी आएका एक हजार २० गरि दुई हजार तीन सय ५० मुद्धा दर्ता भएकोमा ७ सय ५ मुद्धा फेरी पनि फर्छयौट गर्न बाँकि रहेका छन् ।

कञ्चनपुर अदालतले आर्थिक वर्ष २०७८।७९ मा ४४ दशलमलव १५ प्रतिशत, आर्थिक वर्ष २०७९।८० मा ५२ दशमलव १० प्रतिशत, आव २०८०।८१ मा ५३ दशलमल ८३ प्रतिशत मुद्धा फर्छयौट गरेको थियो ।
त्यस्तै अदालतले दुई वर्ष पुराना मुद्धा शुन्यमा झारेको छ । २०७८/०८९ मा ३२, ०७९/८० मा २६, २०८०/८१ मा २९ मुद्धा दुई बर्ष पुराना रहेका थिए । अदालतले पुराना मुद्धा हरुलाई प्राथमिकतामा राखेर कार्य सम्पादन गरेको कारण दुई बर्ष पुराना मुद्धा शुन्यमा झार्न सफल भएको जिल्ला अदालतका न्यायधिश आत्मराम जोशीले बताए । दुई बर्ष नाघेका मुद्धा शुन्यमा झारेता पनि १८ महिना नाघेका १९ मुद्धाको छिनोफानो गर्न बाकि रहेको छ ।

लागू औषधका मुद्धा बढी

जिल्लामा पछिल्लो समय लागु औषध सेवनका मुद्धा बढ्दैँ गएका छन् । चालु आर्थिक वर्षमा मात्रै कञ्चनपुर जिल्ला अदालतमा लागु औषधका एक सय ८९ मुद्धा दर्ता भएका छन् । त्यस्तै अन्य फौजदारी मुद्धामा अभद्र व्यवहारका ६६, जबरजस्ती करणीका ३८, जबरजस्ती करणी उद्योगका २६, ठगीका ३०, बिवाह सम्बन्धी कसूरका ४२ र मानव बेचबिखन तथा ओसार पसारका १७ मुद्धा दर्ता भएका छन् ।
त्यस्तै देवानी मुद्धातर्फ सम्बन्ध विच्छेदका दुई सय ९१, अंश समेतका ७५ र लेनदेनका ४२ मुद्धा दर्ता गरिएको कञ्चनपुर जिल्ला अदालतले जनाएको छ ।

जिल्ला अदालतका न्यायधिश आत्मराम जोशीले कानूनी व्यवस्था अनुसार अदालतले न्यायनिरोपण कार्य गरिरहेको बताए । कार्यालयको व्यवस्थापकीय पक्ष सुधारसँगै कार्यसम्पादनमा जोड दिएकाले मुद्धा फछ्यौटको दर बढेको उनको भनाई छ ।

उनका अनुसार पछिल्लो समय लागु औषधका मुद्धाहरु अत्यधिक बढेकाले त्यसलाई रोक्न अभियान नै सञ्चालन गर्नुपर्ने आवश्यकता देखिएको छ । ‘खुला सिमा नाकाका कारण युवाहरुमा लागु औषधको प्रयोग बढ्दो छ,’ न्यायधिश जोशीले भने, ‘यसले समाजलाई नै आक्रान्त बनाई रहेको छ, यस विरुद्ध सबैले अभियान चाल्न जरुरी छ ।’