परशुराम नगरपालिकाको प्रमुख प्रशासकिय अधिकृतमा उप सचिव अर्याल

डडेल्धुरा–संघीय मामिला तथा सामान्य प्रशासन मन्त्रालयले बिहीबार एक सय २२ जना उपसचिव र ९७ जना शाखा अधिकृतको एकै पटक सरुवा गरेको छ । सोही अनुसार डडेल्धुरा जिल्लाका परशुराम नगरपालिका लगायत तिन वटा स्थानीय तहमा नयाँ प्रमुख प्रशासकीय अधिकृत(हाकिम) आउने भएका हुन् । जिल्ला सदरमुकामको अमरगढी नगरपालिका, भित्री मधेसमा पर्ने परशुराम नगरपालिका र आलिताल गाउँपालिकामा नयाँ हाकिम आउने भएका हुन् ।
परशुराम नगरपालिकामा उपसचिव मोहन अर्याल आउने भएका छन् । मुख्यमन्त्री तथा मन्त्रिपरिषद्को कार्यालय लुम्बिनी वा अन्तर्गत कार्यरत अर्याल परशुराम नगरपालिकामा आउने भएका हुन् । यसअघि परशुराममा कल्पना भट्टले हाकिमका रूपमा कामकाज गरिरहेकी थिइन् ।
त्यसैगरी अमरगढी नगरपालिकामा नयाँ हाकिमको रूपमा उपसचिव नवराज ओझा आउने भएका छन् । ओझा सुदूरपश्चिम प्रदेश मुख्यमन्त्री तथा मन्त्रिपरिषद्को कार्यालय वा अन्तर्गत कार्यरत थिए । यसअघि अमरगढीमा लक्ष्मीप्रसाद उपाध्यायले प्रमुख प्रशासकीय अधिकृतको जिम्मेवारीमा काम गरिरहेका थिए ।
त्यसैगरी आलिताल गाउँपालिकाको प्रमुख प्रशासकीय अधिकृतको रूपमा दीपेन्द्रराज अधिकारी आउने भएका छन् । उद्योग, वाणिज्य तथा आपूर्ति मन्त्रालय वा अन्तर्गत कार्यालयमा कार्यरत अधिकारी आलितालको हाकिमको रूपमा आउने भएका हुन् । हालै आलितालका प्रमुख प्रशासकीय अधिकृत नरेन्द्रसिंह ठगुन्नाको सरुवा भएको थियो । उनको ठाउँमा मन्त्रालयले अधिकारीलाई आलिताल पठाएको छ ।
अव डडेल्धुरा जिल्लाका सबै स्थानीय तहले पूर्ण जिम्मेवारीका प्रमुख प्रशासकीय अधिकृत पाएका छन् । जसको कारण पालिकाहरुले आफ्नो सेवा प्रवाहलाई चुस्तगति दिने अपेक्षा गरीएको छ ।