दोधारा चाँदनीमा विपद् पूर्वतयारीका लागि ‘टेबलटप कृत्रिम नमुना घटना अभ्यास’

महेन्द्रनगर–कञ्चनपुर जिल्लाको दोधारा चाँदनी नगरपालिकामा विपद् पूर्वतयारी तथा प्रतिकार्य योजना २०८२ अन्तर्गत ‘टेबलटप कृत्रिम नमुना घटना अभ्यास’ सम्पन्न गरीएको छ । मनसुनमा आउन सक्ने बाढी, डुबान, भूक्षय र अत्यधिक वर्षा जस्ता प्राकृतिक विपद्हरूको सामना गर्न सरोकारवाला निकायहरूलाई तयार पार्ने उद्देश्यले उक्त अभ्यासको आयोजना गरिएको हो । सम्भावित मनसुनी विपद्बाट हुने क्षति न्यूनीकरण गर्न र समुदायलाई सुरक्षित राख्न दोधारा चाँदनी नगरपालिकामा कार्यक्रमको आयोजना गरीएको आयोजकले जानकारी दिएको छ ।

उक्त कार्यक्रम आयोजना गर्न नेपाल राष्ट्रीय समाज कल्याण संघ (एनएनएसडब्लुए), दोधारा चाँदनी नगरपालिका, क्लाइमेट रेजिलियन्स एलायन्स, मर्सीकोर, डिसिए, युनिसेफ, निड्स नेपाल र अक्सफामले सहकार्य गरेको हो । कार्यक्रमले विपद् व्यवस्थापनमा स्थानीय तह, राष्ट्रिय तथा अन्तर्राष्ट्रिय गैरसरकारी संस्थाहरू र मानवीय सेवा प्रदायकहरूबीचको समन्वयलाई थप सुदृढ बनाएको एनएनएसडब्लुएका कार्यकारी निर्देशक अशोक विक्रम जैरुले बताए ।

एनएनएसडब्लुएका कार्यकारी निर्देशक जैरुले कृत्रिम नमुना अभ्यासको आवश्यकतामाथि प्रकाश पार्दै विपद् जोखिम र त्यसको प्रभाव न्यूनीकरणका लागि पूर्वतयारी कसरी गर्ने ? भन्ने विषयमा जोड दिए । उनले मनसुनको उच्च जोखिमलाई ध्यानमा राख्दै बाढी, डुबान, भू–क्षय, अत्याधिक वर्षा लगायतका सम्भावित प्राकृतिक विपद्का परिदृश्यहरूमा कसरी प्रभावकारी रूपमा काम गर्न सकिन्छ ? भन्नेबारे आठवटा कृत्रिम नमुना घटनामार्फत अभ्यास गरिएको बताए ।

दोधाराचाँदनी नगरपालिकाका नगर प्रमुख किशोर कुमार लिम्बूले दोधारा चाँदनीमा गत वर्ष गरीएको कार्यक्रमको स्मरण गर्दै सरोकारवाला निकायलाई सक्षम बनाएको र कार्यक्रमले विपद्को समयमा तत्काल प्रतिक्रिया जनाउन सक्ने क्षमताको विकास गरेको बताए । गत बर्षको कार्यक्रमको परीणामस्वरुप स्थानीय समुदायको सुरक्षाका लागि निकै महत्त्वपूर्ण भएको नगर प्रमुख लिम्बुले बताए ।

एनएनएसडब्लुएका सुदृढ परियोजना संयोजक राजकुमार सुनारले गत वर्ष पनि दोधाराचाँदनीमा कृत्रिम नमुना अभ्यास गरिएको र यसले विपद्को सामना गर्न तयार पार्न महत्त्वपूर्ण प्रभाव पारेको बताए । उनले यस्ता अभ्यासद्धारा विपद् प्रतिकार्य टोलीहरूको क्षमता अभिवृद्धि गर्ने र समुदायलाई सुरक्षित राख्न मद्दत गर्ने बताए ।

निडस् नेपालका प्रतिनिधि दिव्य देव पण्डितले बाढी आउनुअघि र आइसकेपछि के कस्तो कदम चाल्ने ? भन्ने सन्दर्भमा टेबुलटप अभ्यास महत्वपूर्ण हुने बताए । सम्बन्धित निकायहरूलाई पूर्वतयारी र उद्धार कार्यका लागि स्पष्ट मार्गनिर्देशन प्रदान गर्ने निड्स नेपालका प्रनिनिधि पण्डितले बताए ।

कार्यक्रममा स्थानीय विपद् व्यवस्थापन समिति, सामुदायिक विपद् व्यवस्थापन समिति, जिल्ला आपतकालीन कार्य सञ्चालन केन्द्र, स्थानीय आपतकालीन कार्य सञ्चालन केन्द्र, मानवीय सेवा प्रदायक संघ–संस्था, नेपाल प्रहरी, सशस्त्र प्रहरी बल, नेपाली सेना र उत्थानशील युवा सञ्जालहरूले महाकाली नदीको बाढी पूर्वानुमानका विभिन्न परिदृश्यहरूमा आ–आफ्नो भूमिका बारे नमुना घटना अभ्यास गरेका थिए। अभ्यासले सबै सरोकारवाला निकायहरूलाई एकसाथ बसेर योजना बनाउन र विपद्को समयमा आ–आफ्नो जिम्मेवारी बुझ्न मद्दत गर्ने अपेक्षा गरीएको छ ।