टर्चलाइटको भरमा प्रसूति सेवा, कोटपेटरा स्वास्थ्य चौकीमा विद्युत् संकट

महेन्द्रनगर – बैतडीको डिलासैनी गाउँपालिका–२ स्थित कोटपेटरा स्वास्थ्य चौकीमा विद्युत् सेवा अवरुद्ध हुँदा स्वास्थ्य सेवा प्रभावित बनेको छ। करिब डेढ महिनादेखि विद्युत् समस्या समाधान नभएपछि स्वास्थ्यकर्मीहरू टर्चलाइटको सहारामा समेत प्रसूति सेवा दिन बाध्य छन ।

स्वास्थ्य चौकीमा कार्यरत स्वास्थ्यकर्मी शान्ति पन्तले सामाजिक सञ्जालमार्फत २४सै घण्टा स्वास्थ्य सेवा सञ्चालन गर्नुपर्ने भए पनि विद्युत् अभावका कारण सेवा प्रवाह निकै कठिन बनेको बताएकी छन्। उनले स्वास्थ्य चौकीमा रातिको समयमा प्रसूति सेवा दिनुपर्दा टर्चलाइटको भर पर्नुपर्ने अवस्था रहेको उल्लेख गरेकी छन्।

उनका अनुसार टर्चलाइट चार्ज गर्न समेत करिब ३० मिनेट पैदल हिँडेर अर्को स्थानमा जानुपर्ने बाध्यता छ। एकपटक चार्ज गरिएको टर्चलाइट तीनदेखि चार घण्टासम्म मात्र चल्ने भएकाले आकस्मिक सेवा सञ्चालनमा समस्या हुने गरेको छ।

“स्वास्थ्य चौकीमा बिजुली भए पनि यस्ता संवेदनशील सेवाका लागि वैकल्पिक विद्युत् व्यवस्था आवश्यक हुन्छ। तर यहाँ बिजुली नै बिग्रिएर लामो समयदेखि सञ्चालनमा छैन,” पन्तले सामाजिक सञ्जालमा लेखेकी छन्।

स्वास्थ्य चौकी परिवारले सेवाग्राहीको आवश्यकतालाई ध्यानमा राखेर कठिन परिस्थितिमा पनि सेवा निरन्तर दिइरहेको जनाएको छ। तर सम्बन्धित निकायले समस्या समाधानमा चासो नदिए सेवा सञ्चालन नै प्रभावित हुन सक्ने चेतावनी दिएको छ।

स्वास्थ्यकर्मीहरूले स्वास्थ्य सेवा जस्तो संवेदनशील क्षेत्रमा देखिएको विद्युत् समस्याप्रति स्थानीय तथा सम्बन्धित निकायको तत्काल ध्यानाकर्षण गराएका छन्। उनीहरूले विद्युत् आपूर्ति तथा वैकल्पिक ऊर्जा व्यवस्थाको पहल गर्न माग गरेका छन्।