भारतबाट उद्धार गरिएकालाई गन्तव्य स्थानमा जान यातायात व्यवसायीले गरे सहयोग

महेन्द्रनगर–भारतबाट उद्धार गरी ल्याईएकालाई घर पठाईएको छ । बिहीबार विभिन्न यातायात कम्पनीको सहयोगमा पिडितहरुलाई सम्बन्धित जिल्लातर्फ पठाइएको हो । नेपाली दूतावास, भारतीय प्रहरीलगायतको पहलमा उनीहरुलाई भारतको उत्तराखण्ड प्रदेशको रुद्रपुर र काशीपुरबाट उद्धार गरी बुधबार महेन्द्रनगर ल्याईएको थियो ।

उद्धार गरीएकामध्ये १० जना धनगढी, ९ जना नेपालगञ्ज, २१ जना काकडभिट्टा, २ जना पोखरा, १ जना बुटवल(दाङ), १५ जना काठमाण्डौ जाने सार्वजनिक यातायातमा पठाईएको छ । पवनदुत सार्वजनिक सेवा प्रा लि, सुनौलो यातायात कम्पनी प्रा लि, शुक्लाफाटा यातायात प्रा लि, पवनदुत अटो मेनेजमेन्ट प्रा लि, ब्लु सगरमाथा यातायात प्रा लि, नेपाल यातायात स्वतन्त्र मजदुर सङघको संयुक्त व्यवस्थापनमा उनीहरुलाई घरसम्म जाने व्यवस्था मिलाईएको हो ।

सबै जनाको भाडा जोड्दा एक लाख ३६ हजार हुन्छ । त्यो सबै सयुक्त व्यवस्थापन समितिले मिलाईदिएको हो । सयुक्त व्यवस्थापन समिति अन्तरगत पवनदुत सार्वजनिक सेवा प्रा लि, सुनौलो यातायात कम्पनी प्रा लि, शुक्लाफाटा यातायात प्रा लि, पवनदुत अटो मेनेजमेन्ट प्रा लि, ब्लु सगरमाथा यातायात प्रा लि, नेपाल यातायात स्वतन्त्र मजदुर सङघ रहेका छन् ।

उनीहरु कसरी बन्धक बने ?

आकर्षक काम र पारिश्रमिक दिने प्रलोभन देखाएर रुद्रपुर र काशीपुर बोलाई उनीहरुलाई बन्धक बनाईएको थियो । उद्दार गरीएका ५७ जनाबाट जनही २३ हजार भारु असुलेका थिए ।
उनीहरुमध्ये चितवनका १०, कैलालीका ९, सुनसरीका ५, उदयपुर, तेह्रथुमका र पाँचथरका ४÷४, दाङ, स्याङ्जा र बाँकेका ३/३ जना, ताप्लेजुङ, डोटी र धादिङका २/२ जना तथा सर्लाही, कास्की, रुकुम, बागलुङ, इलाम र रुपन्देहीका १/१ जना रहेका छन् । महेन्द्रनगरमा उनीहरूको बसोबास र खानाको व्यवस्थापन कञ्चनपुर उद्योग वाणिज्य संघले गरेको थियो ।

केही महिनाअघि ताप्लेजुङका सोम लिम्बुको मृत्युपछि आकर्षक रोजगारीको प्रलोभनमा भारत पुगेका नेपाली युवाहरू त्यहाँ बन्दक भएको घटना बाहिर आएको थियोे।