महेन्द्रनगरमा थरकै कारण तुलसीले पाईनन् डेरा, को होलान् थर सोधेर डेरा छैन भन्ने ?

महेन्द्रनगर–तुलसीले सुदूरपश्चिम विश्वविद्यालय वरपरका धेरैजसो घरमा चाहार्दा पनि डेरा पाउन सकिनन्, कारण एउटै छ त्यो हो थर । दैलेख घर भई हाल सुदूरपश्चिम विश्वविद्यालयमा कानुन संकाय अन्तरगत छैटौ सेमिष्टरमा अध्ययनरत विद्यार्थी तुलसी विकले थरकै कारण विश्वविद्यालय आसपासका घरमा डेरा नपाएको गुनासो जिल्ला प्रशासन कार्यालय कञ्चनपुरमा उपस्थीत भएर प्रमुख जिल्ला अधिकारी नारायण प्रसाद सापकोटालाई सुनाईन् । विश्व अर्को ग्रहमा आवासको खोजी गरीरहदा कञ्चनपुरमा मानवले मानवको घरमा डेरा पाउन मुस्किल परेको विषय सार्वजनिक भएको छ । विद्यार्थी विकले पनि प्रमुख जिल्ला अधिकारी सापकोटालाई आफ्नो पीडा सुनाइन् । उनले आफूले डेराका लागि विश्वविद्यालय आशपास क्षेत्रका सबै घर पुगेको बताइन् । ‘कोठा हेर्न जान्छु, कोठा छ भन्नु हुन्छ, जात सोधेपछि दलित हुँ भन्ने थाह पाएपछि हुँदैन भन्छन्’ उनले सुनाइन्,‘मलाई यहाँ यसरी जातीय विभेद हुन्छ भन्ने थाह थिएन, कोठा पाउँदैन भन्ने थाह थिएन ।’

जातका कारण कोठा नपाएपछि आफू मानसिक रुपमा पीडामा परेको समेत उनले सुनाइन् । प्रमुख जिल्ला अधिकारी नारायण प्रसाद सापकोटाले पनि उनलाई लिखित उजुरी लिएर आए थरकै कारण विभेद गरी डेरा नदिने घरवेटीलाई कारवाहीका प्रक्रिया अगाडि बढाउने प्रतिबद्धता व्यक्त गरेका छन् । ‘कसैले आफ्नो घर भाडामा दिन्न सक्छ, त्यो उसको अधिकारको कुरा हो, तर सुरुमा भाडामा लगाउन खोज्ने पछि जात सोधेर भाडामा दिन्न भन्न पाउँदैन, कानुनी रुपमा योगर्न पाईदैन’ उहाँले भन्नुभयो ।
केहि दिन अगाडिमात्र तुलसीले भाडा नपाएको बेदना आफ्नो फेसबुक वालमा राख्नु भएको थियो । त्यसैलाई आधारमानी नयाँ खवर अनलाईनhttps://nayaakhabar.com/?p=4844 र विकल्प दैनिक पत्रिकाले प्रकाशित गरेपछि संयुक्त दलित संघर्ष समिति गठन भएको छ, जसले आज प्रमुख जिल्ला अधिकारीमार्फत प्रधानमन्त्री तथा मन्त्रीपरिषद कार्यालयलाई ज्ञापन पत्र पनि बुझाएको छ ।
संयुक्त दलित संघर्ष समितिले ज्ञापन पत्रमा स्थानीय तहले घर भाडामा दिने सबै घरधनी सूचीकृत गरी सबैलाई भाडामा दिन सकिने व्यवस्था गर्न ज्ञापन पत्रमा माग राखेको छ । संघर्ष समितिका अध्यक्ष गणेश नेपालीको नेतृत्वमा प्रमुख जिल्ला अधिकारीलाई ज्ञापन बुझाइएको हो । मुक्ति समाज कञ्चनपुरका अध्यक्ष राजेन्द्र आग्रीले ज्ञापन वाचन गर्नुभएको थियो । नेकपा एकीकृत समाजवादीका केन्द्रीय सल्लाहकार प्रताप तिरुवा, नेकपा माओवादी केन्द्रका सुदूरपश्चिम प्रदेश कमिटी सदस्य गणेश विक, मुक्ति समाजका केन्द्रीय सदस्य रमेश तिरुवा, नेकपा समाजवादीका विनोद नेपाली, अधिकारकर्मी नरेश सिलाल लगायत नेताहरु प्रशासन कार्यालय पुगेका थिए ।