कर्णालीमा खसेको मान्छे उद्धार गर्न गएका आठ जना हिजोदेखि भोकभोकै भीरमै अड्कीए

महेन्द्रनगर– बाजुराको स्वामिकात्तिक खापर गाउँपालिका २ फयाल गाउँका पुसे भण्डारीलाई उद्धार गर्न गएका ८ जना हिजोदेखि भोकभोकै भीरमै अड्कीएका छन् । माछा मार्न दिनहुजसो कर्णाली नदी जाने पुसे झरेउला हाल्ने र जाल खेल्ने गर्दै आएका थिए । आइतबारपनि जाल सहीत कर्णाली नदीमा पुगेका पुसेले आफुले हालेको झर्उलाँको माछा संकलन गरे र केही माछा जाल हानी मारेर फर्किने बेला एक्कासी चिप्लीएर त्यही लडेँ र कर्णाली नदीको किनारामा खस्दा उनको मृत्यू भएको छ ।

घाइते भएका पुसेले आफन्तलाई फोन गरी हातखुट्टा भाँचिएको र उठ्न नसक्ने अवस्थामा पुगेको र आफन्तलाई उद्धारको लागि अपिल गरेको उनका आफन्तले बताएका छन् । आईतबार ४ बजेको समयमा गाउँबाट ४ जना पुरुष, एक महिला र ३ जना बालबालिका हतार हतार उद्दारका लागि घटना स्थल पुग्दासम्म ५ बजीसकेको र ३८ बर्षिय पुषे अचेत अवस्थामा रहेका थिए ।

तर उद्दारका लागि गएका आफन्त पुसे खसेको स्थान नपुग्दै बीचैमा फसे । पुसे भण्डारीको ज्यान गइसकेको छ । अरु उद्दारका लागि गएका आठ जना पनि आइतबार साँझदेखि बीचमै अड्कीएका छन् । तल झर्दा कर्णाली नदी छ । माथि आउन भीर छ जता गएपनि जोखिममा छन् उनीहरु ।

उद्दारका लागि सहज हुनेभएपछि ३ जना १२÷१३ वर्षका बालबालिका पनि साथमा लिएर गएको देखिन्छ । उनीहरु पनि खानापानी विनै हिजैदेखि भीरमै अड्कीएको भन्छन्, स्वामिकात्तिक खापर गाउँपालिका २ का वडा अध्यक्ष विष्णुबहादुर बुढा । पुसे भण्डारी र भीरमा अड्कीएका स्थानीय सबै बुढाकै गाउँका आफन्त हुन् ।

साँझदेखि नै प्रहरीको टोली घटना स्थलमा छ । तर उद्दारको कुनै विकल्प नभएपछि सबैजना जागराम देखिन्छ । भीरबाट खसेको मान्छेको ज्यान गइसक्यो, उद्दारका लागि गएकाहरुको उद्दारमा थप समस्या देखिएको वडाध्यक्ष बुढाले जानकारी दिए । उनका अनुसार हिमाली गाउँपालिकाबाट बोट ल्याउने तयारी भइरहेको छ ।

कर्णालीमा बोट मार्फत उद्दारको तयारी गरिएको छ । त्यो पनि तत्काल उद्दार हुने अवस्था देखिदैन् । भीरमै अड्कीएकाहरु भोकभोकै छन् । पानी समेत खान पाएका छैनन् । रातभरिको चिसोले उनीहरुको स्वास्थ्य पनि कमजोर हुँदै गएको देखिन्छ । भीरमा अड्कीएकाहरुले आफूहरुको उद्दारको अपिल गरिरहेका छन् । डोरी अड्काएर तान्ने अवस्था समेत नरहेको स्थानीयको भनाई छ । उनीहरुलाई पनि कर्णाली नदी किनारमै खसाएर बोट मार्फत नै उद्दार गर्नु पर्ने अवस्था देखिन्छ ।

यता बाजुराका प्रमुख जिल्ला अधिकारी मेघनाथ पाध्यायले मृतकको शव नदीको खोचमा रहेको र अड्कीएका स्थानीय पनि भीरको बीच स्थानमा रहेकोले हेलिकप्टर मार्फत उद्दारको संभावना नरहेको बताउँछन् । हिजैबाट प्रहरीको उद्दारटोली घटनास्थलमै रहेकोले कर्णालीमा बोट मार्फत शव र अड्कीएका स्थानीयलाई उद्दारको उपाय निकालिएको जानकारी दिए ।

माछा पर्ने सिजन भएकोले यतिबेला स्थानीय कर्णाली नदीमा झरेउलाँ हाल्ने, जाल खेल्ने गर्दछन् । माछा मारेर उनीहरुले दैनिक आम्दानी गर्ने गरेको देखिन्छ । नदीमा जाल खेल्ने क्रममै चिप्लीएर घाइते हुने, ज्यान समेत जाने घटनाहरु वर्षेनी घट्ने गरेका छन् ।