विद्यार्थी भर्ना अभियानको मुखमा शिक्षक तनावमा, कार्यदलको प्रतिवेदन कार्यन्वयन नगर्न माग

महेन्द्रनगर – बैशाखको दास्रो साता अर्थात बैशाख ९ गते, शिक्षक, शिक्षिका, विद्यालय व्यवस्थापन समिति अध्यक्षलगायतको टिम घरदैलो, प्रचारप्रसार अभियान तथा विभिन्न तालिम, अभिमुखिकरणमा व्यस्त हुनुपर्ने समय हो । तर भीमदत्त नगरपालिकाका अधिकांस सामुदायिक विद्यालय शिक्षक, व्यवस्थापन समिति अध्यक्षहरु नगरपालिकाको कार्यालय धाईरहेका भेटिन्छन् । केहि विद्यालय व्यवस्थापन समिति अध्यक्ष, प्रधानाध्यापकहरु एक महिनादेखि नै नगरपालिका कार्यालय धाउदै आएका छन् । कसैको व्यक्तिगत काम हुनपनि सक्छ ? तर उनीहरुमध्ये अधिकांसको चासो चिन्ता र नजर भने नगरपालिकाले विद्यालय समायोजन तथा शिक्षक दरबन्दी मिलान सम्बन्धी अध्ययन विश्लेषण, सिफारिस गर्न गठन गरेको उच्चस्तरीय कार्यदलले गरीरहेको अध्ययनमा रहेको बुझिन्थ्यो । चैत ८ गते गठन गरीएको कार्यदलले बैशाख ६ गतेसम्मको अध्ययन प्रतिवेदनका लागि समय पाएको भएपनि चैत ३० गते नै आफ्नो अध्ययन प्रतिबेदन बुझायो ।

लगत्तै नगरपालिकाले बैशाख ७ गते वेवसाईटमार्फत कार्यदलको अध्ययन प्रतिवेदन सार्वजनिक गरेको छ । उक्त प्रतिवेदनमा कार्यदलको सल्लाहसहित तह घटुवा र समायोजन हुने विद्यालयको नामावली रहेको छ । विद्यालय मर्ज र तह घटुवा हुने विद्यालयका नामावली सार्वजनिक गरीएपछि भने अभिभावक, व्यवस्थापन समिति रुष्ट हुदै प्रतिवेदन कार्यन्वयन नगर्न माग राखिरहेका छन् ।
भीमदत्त नगरपालिका १० तिल्केनीको विष्णु मन्दिर आधारभूत विद्यालयको डाउन साइज गर्ने निर्णय पुनर्विचार गर्न अभिभावकहरुले निवेदन दिएका छन् । समायोजन सूचीमा राखिएका अधिकांस विद्यालय एमाले, नेकपालगायत दल निकट रहेका व्यक्ति व्यवस्थापन समिति र प्रधानाध्यापक छन् । ति विद्यालयहरुमा काग्रेसनिकट शिक्षक लाई प्रधानाध्यापक बनाउन तह घटुवा गरीएको आरोप उनीहरुको छ ।

काँग्रेस सम्बद्ध नेपाल शिक्षक संघ आवद्धलाई प्रधानाध्यापक बनाएर ती विद्यालय पठाउन लागिएको चर्चा व्यापक भएको छ । सत्तारुढ दल नगरपालिका क्षेत्रका विद्यालयमा आफ्नो पार्टी निकट शिक्षकको दबदबा बनाउन चाहने खोजेको शिक्षकहरु बताउँछन् । त्यसका लागि कार्य दलबाट मेयर बोगटीले शिक्षक सरुवा आफू अनुकूल हुने गरी निर्णय गर्न सुझाव पाएका छन् ।
डाउन साइज गरिएका विद्यालयमा सिनियर शिक्षक हुँदा पनि सरुवा गरी आफू नजिककलाई सरुवा गरी प्रधानाध्यापक बनाउने तयारी छ । नगरपालिकाले राजनीतिक आस्था र पहुँचका आधारमा डाउन साइज र सरुवा गर्ने तयारी गरेपछि शिक्षकहरु नगरपालिका कार्यालय पुगेका हुन् ।
‘हामीमाथि ठूलो अन्याय हुँदैछ भन्ने सुनिएको छ, यदि त्यस्तो भयो भने त्यो सह्य हुँदैन’ बुधबार भीमदत्त नगरपालिका कार्यालयमा भेटिएका एक शिक्षकले भने,‘कानुनी र सडक दुबै लडाँई लड्छौ ।’
कार्य दलले सत्तारुढ दल समर्थक शिक्षकलाई जोगाउने गरी माध्यमिक तहमा न्यून विद्यार्थी संख्या भएर पनि विद्यालय डाउन साइज गर्न रोकेको शिक्षकहरुले बताए । डाउन साइजको विवरण हेर्दा पनि काँग्रेस समर्थक अध्यक्ष र प्रधानाध्यापक भएका अधिकाँश विद्यालय डाउन साइज गरिएका छैनन् । ती विद्यालयका प्रधानाध्यापकलाई अन्यत्र पठाएर सुधार गर्ने लक्ष्य नगरपालिकाले राखेको छ ।
शिक्षक सरुवाको सूची तयार गरि सार्वजनिक गर्न रोकेको शिक्षकहरु बताउँछन् । शिक्षा शाखाले त्यसलाई एकमुष्ट कार्यपालिका पेश गरी निर्णय गर्ने योजना बनाएको छ ।
भीमदत्तको सामाजिक विकास समितिका संयोजक सुशिल कुमार भट्टले राजनीतिक आस्थाका आधारमा नभएर विद्यालय संख्याका आधारमा डाउन साइज गरिएको र विधि मापदण्ड अनुसार दरबन्दी मिलान गर्न लागिएको बताए । उनले शैक्षिक गुणस्तर बृद्धि गर्न मापदण्ड टेकेर नै दरवन्दी मिलान भईरहेको बताए ।