बार्षिक समीक्षा तथा योजना तर्जुमा गोष्ठी सम्पन्न

महेन्द्रनगर – स्वास्थ्य कार्यालय कञ्चनपुरको अयोजनामा भएको बार्षिक समीक्षा गोष्ठी सम्पन्न भएको छ । विहीबार आर्थिक बर्ष २०८१/०८२ मा सम्पादित कार्यक्रमहरुको जिल्ला स्तरीय ‘बार्षिक समीक्षा तथा योजना तर्जुमा गोष्ठी’ सम्पन्न गरीएको हो ।

बार्षिक समीक्षा तथा योजना तर्जुमा गोष्ठी बुधबार र विहिबार गरी दुई दिन सम्म चलेको हो ।

गोष्ठीमा आर्थिक बर्ष २०८१/०८२ मा जिल्लाका नौ वटै पालिका, महाकाली प्रादेशिक अस्पताल, महाकाली आयुर्वेद औषधालय र दातृ निकायहरुले सम्पादन गरेका स्वास्थ्य कार्यक्रमहरुको प्रगति प्रतिवेदन प्रस्तुत गरीएका र सोही प्रगति प्रतिवेदनको आधारमा उत्कृष्ठ कार्यसम्पादन गर्ने तिन ओटा कार्यालय छनौट गरी सम्मान पत्र प्रदान गरीएको छ ।

कार्य सम्पादनको आधारमा लालझाडी गाउपालिकाले जिल्लामा उत्कृष्ठ स्थान हासिल गरेको छ । द्धितिय स्थान बेलडाडी गाउपालिका, तृतिय स्थान बेदकोट नगरपालिकाले हासिल गरेको छ । उत्कृष्ठ तिनै स्थानीय तहका स्वास्थ्य शाखा प्रमुखहरुलाई दोसल्ला ओडाई प्रमाण पत्र प्रदान गरीएको छ । त्यसैगरी गोष्ठीमा सहभागिलाई पनि सम्मानपत्र प्रदान गरीएको छ ।

३२ वटा स्वास्थ्य सूचकांकका आधारमा मूल्यांकन गरी उत्कृष्ठ तिन पालिका छनौट गरीएको थियो । साथै प्रस्तुतिकरण, समन्वय, सहकार्य वित्तिय खर्च लगायत लाई पनि आधार बनाईएको स्वास्थ्य कार्यालय कञ्चनपुरका निमित्त कार्यालयका प्रमुख नरेन्द्र सिंह रावलले बताए । कार्यक्रमबाट चालु आवको योजना तर्जुमा समेत गरीएको छ ।

गोष्ठिमा जिल्लाका नौ वटै स्थानीय तह, महाकाली प्रादेशिक अस्पताल, महाकाली आयुर्वेदिक औषधालय, सहयात्रा नेपाल, एनएसएसडब्लुए, राष्ट्रिय विमा बोर्ड, रेडक्रस, हेल्पडेस्क गड्डाचौकीबाट दुई/दुई जनाको सहभागिता रहेको थियो ।
समापन कार्यक्रमको सभापतित्व स्वास्थ्य कार्यालय कञ्चनपुरका निमित्त प्रमुख नरेन्द्र सिंह रावलले गरेकोमा प्रमुख अतिथि जिल्ला समन्वय प्रमुख दुर्गादत्त बोहरा रहेका थिए । त्यसैगरी महाकाली अस्पतालका मेडिकल सुपरिटेन्डेन्ट डा. अर्जुन भट्ट, महाकाली आयुर्वेद औषधालयका कार्यालय प्रमुख सुर्य उपाध्यय, पत्रकार महासंघका उपाध्यक्ष धर्मारोकाया अतिथि रहेका थिए ।
दुई दिने गोष्ठीले धेरै नै उपलब्धी हासिल गर्नुका साथै स्वास्थ्य सम्बन्धी भावि रणनिति निर्माण गर्न सहज भएको अपेक्षा गरेको जिल्ला समन्वय प्रमुख दुर्गादत्त बोहराले बताए । उत्कृष्ठ हुने पालिकाकालाई धन्यवाद दिदै उत्कृष्ठ हुन नसकेका पालिकाहरुलाई आगामी दिनमा उत्कृष्ठ हुन प्रयास गर्न आग्रह गरे ।
स्वास्थ्य कार्यालय कञ्चनपुरका प्रमुख नरेन्द्र सिंह रावलले सामुहिक कार्यद्धारा उदेश्य र लक्ष्य प्राप्त गर्न सहज हुने भएकाले सबैले समन्वय, सहकार्य गरेर अगाडि बढ्नुपर्ने बताए । नसर्ने रोगका विरामीहरुलाई आयुर्वेदिक र योगतिर लगाउन सकेको खण्डमा औषधीको डोज पनि घटाउन सकिने महाकाली प्रादेशिक अस्पतालका सुपरिटेन्डेन्ट डा. अर्जुन भट्टले बताए । उनका अनुसार पछिल्लो समयमा सर्ने रोग भन्दा पनि नसर्ने रोगको ट्रेण्ड बढिरहेको बताए । त्यसैगरी महाकाली अस्पतालमा यसै बर्ष एनआईसियु लगायतका सुविधा थप्ने योजना रहेको उनले बताए । कार्यक्रमको सहजीकरण स्वास्थ्य कार्यालयका सरुवा रोग फोकल प्रसन सिद्धराज भट्टले गरेका थिए ।