सुप विश्वविद्यालयका पदाधिकारी चाकडीमा हदपार गर्दै, शिक्षा मन्त्री पोख्रेललाई बुद्ध, बाँकिलाई घण्टी

महेन्द्रनगर – शिक्षा, विज्ञान तथा प्रविधि मन्त्री सस्मित पोख्रेलले मंगलबार सुदूरपश्चिम विश्वविद्यालको अवलोकन भ्रमण गरेका छन् । बुधबार तय गरीएको दशरथ चन्द शहिद स्वास्थ्य विज्ञान विश्वविद्यालयको सिनेट बैठकका लागि सुदूरपश्चिम पुगेका मन्त्री पोख्रेलले सुप विश्वविद्यालय केन्द्रीय कार्यालयमा पुगि विश्वविद्यालय पदाधिकारी, प्राध्यापक र कर्मचारीसित छलफल गरेका हुन् ।

मन्त्री पोखरेल विश्वविद्यालयका सह कुलपति हुन् । मन्त्री पोखरेलले विश्वविद्यालयका पदाधिकारीहरुसंग विश्वविद्यालयको भौतिक पूर्वाधार विस्तार, शैक्षिक गुणस्तर अभिवृद्धि र अनुसन्धान प्रवद्र्धन सम्बन्धमा छलफल गरेका छन् । विश्वविद्यालयका पदाधिकारीहरूले मन्त्रीसमक्ष संस्थाको वर्तमान अवस्था, चुनौती तथा भविष्यका योजनाबारे जानकारी गराए ।

मन्त्री पोख्रेलले विश्वविद्यालयको शैक्षिक गतिविधि तथा पूर्वाधार विकासबारे जानकारी लिँदै आगामी दिनमा आवश्यक सहयोग गर्ने प्रतिबद्धता व्यक्त गरे ।

विश्वविद्यालयका रजिस्ट्रार प्रा.डा. बिनोद लेखकले स्वागत कार्यक्रममा मन्तव्य राख्दै मन्त्री पोखरेलको आवगमनले विश्वविद्यालयको शैक्षिक तथा संस्थागत विकासमा थप ऊर्जा थपिने विश्वास व्यक्त गरे ।

विश्वविद्यालयका डिन प्रा. किशन दत्त भट्टले विश्वविद्यालयले गुणस्तरीय शिक्षाका लागि गरीएका प्रयासहरूबारे मन्त्री पोखरेललाई जानकारी गराए ।

विश्वविद्यालयका उपकुलपति प्रा.डा. हेम राज पन्त सहित पदाधिकारीले मन्त्री पोखरेललाई फूललामा र खादा लगाएर स्वागत मात्रै गरेनन् । मन्त्रीसहितको अवलोकन भ्रमणमा आएको टिमलाई मायाको चिनोको रुपमा ‘घण्टी सहितको ढोका’ प्रदान गरीएको छ । मन्त्री पोख्रेललाई मायाको चिनो गौतम बुद्ध प्रदान गरीएको हो भने उनीसंगै आएका सांसद केपि खनाल, सचिवलगायतलाई मायाको चिनो घण्टी प्रदान गरीएको छ । विश्वविद्यालयका पदाधिकारीहरु मन्त्रीको चाकडीमा लिप्त हुदा विश्वविद्यालयको गरीमा समेत विर्सेका छन् । विश्वविद्यालयले कुनै पार्टीको चुनावचिन्हलाई मायाको चिनोकोरुपमा वितरण गर्नु विश्वविद्यालयको उपहास भएको स्थानीयको बुझाई छ ।

विश्वविद्यालयका पदाधिकारी, प्राध्यापक तथा कर्मचारी सहभागी कार्यक्रमको सञ्चालन नबीन बहादुर बमले गरेका थिए ।