सुदूरपश्चिम विश्वविद्यालयका डिनको गाडी लुटियो

विरेन्द्र बाग, महेन्द्रनगर – सुदूरपश्चिम विश्वविद्यालय स्वास्थ्य विज्ञान संकायका डिन डाक्टर हेमनाथ जोशीले प्रयोग गर्ने गाडी लुटिएको खबर सार्वजनिक भएको छ । डिन जोशीले चढ्ने बा २ झ २८५९ नम्बरको सेतो स्कारपियो गाडी गत भदौ २५ गते लुटिएको खबर अहिले आएर सार्वजनिक भएको हो ।
डाक्टर जोशीको निजी निवास धनगढी उपमहानगरपालिका–५, हसनपुरबाट भदौ २५ गते दिउँसो करिब १२ बजे मुखमा मास्क लगाएका आठजनाको समूहले गाडी लुटेर लगेका हुन् । घटना लगत्तै डाक्टर जोशीले कैलाली जिल्ला प्रहरी कार्यालयमा जानकारी दिएका थिए ।
कैलाली प्रहरीले उक्त घटना “योजनाबद्ध र असामान्य प्रकृतिको” भएको बताएको छ । गाडी लुट्ने समूहको अहिलेसम्म पहिचान खुल्न सकेको छैन भने गाडी पनि फेला नपरेको प्रहरीले जनाएको छ । विश्वविद्यालयका अनुसार, गाडी बेपत्ता भएको सूचनासहित भन्सार सुरक्षा पोस्ट र नाका क्षेत्रमा समेत सूचना पठाइएको छ ।
प्रहरीले अहिलेसम्म गाडी लुटपाट गर्ने समूहको पहिचान र ठेगाना स्पष्ट हुन नसकेको प्रहरीले बताएको छ । स्रोतका अनुसार, घटना ‘जेन्जी आन्दोलन’ का क्रममा संलग्न समूहहरूसँग सम्बन्धित हुनसक्ने आशंका गरिएको छ ।