व्यवसाय सञ्चालन गरे ५ देखि २५ हजारसम्म जरीवाना

महेन्द्रनगर–कञ्चनपुर जिल्लामा सुनचाँदी पसल संञ्चालन गरे ५ देखि २५ हजारसम्म जरिवाना तिर्नुपर्ने भएको छ । सरकारले यो आर्थिक बर्षका लागि ल्याएको बजेट कार्यन्वयनमा आएसंगै कञ्चनपुरका सुनचाँदी व्यवसायी आन्दोलित भएका छन् । कञ्चनपुर सुनचाँदी व्यवसायी संघले एक प्रेस नोट जारी गरी पाँच दिनका लागि सुनचाँदी पसल बन्द गरी फेरी आन्दोलनमा उत्रेको जनाएको हो । आन्दोलनको क्रममा जोकसै सुनचाँदी व्यवसायीले पसल सञ्चालन गरेमा ५ देखि २५ हजारसम्म जरिवाना तिर्नुपर्ने कञ्चनपुर सुनचाँदी व्यवसायी संघले जनाएको छ । सरकारले ल्याएको बजेटले सुनको कारोबारमा २ प्रतिशत विलासिता कर र हीराजडित गहनामा १३ प्रतिशत भ्याटको व्यवस्था गरेको थियो । कर र भ्याटले उपभोक्ता र व्यवसायी दुवैलाई असर पर्ने भन्दै फिर्ताको माग गर्दै व्यवसायीहरू एक महिनादेखि आन्दोलनमा उत्रिएका थिए । उनीहरुले असार १३ गतेदेखि पसल बन्द गरेकाले सुनचाँदीको भाउ समेत तोकिएको थिएन । असार २६ गते विहीबार सरकारसँग ६ बुँदे सहमति भएपछि व्यवसायीहरुले आन्दोलन फिर्ता लिएका थिए ।

छ बुदे सहमतिको आधारमा बनेको समस्या समाधान कार्यदलको निर्णय नआउदासम्म व्यवसाय सञ्चालन नगर्ने कञ्चनपुर सुनचाँदी व्यबसायी संघले जनाएको छ । आन्तरीक राजश्व कार्यालय कञ्चनपुरले सुन पसललाई विलासिता कर लागु गर्न पत्र सर्कुलर गरेको कञ्चनपुर जिल्ला सुनचाँदी व्यवसायी संघका अध्यक्ष सुरत सुनारले बताए । ‘विल जारी गरेर पसल खोल्न आन्तरीक राजश्व कार्यलय महेन्द्रनगरले पत्र पठाएपछि हामीले व्यवसाय बन्द गरेका छौ,’ अध्यक्ष सुनारले भने, ‘यता महासंघले पुरानै तरीकाले कारोवार गर्न भनी सर्कुलेन जारी गर्ने र सरकारसंग भएको ६ बुदे सहमति पत्रको कुनै सुनुवाई नभएपछि सहमति गरेको के अर्र्थ ? सरकारले ६ बुदे सहमति पत्र कार्यन्वयन नगर्दासम्म आन्दोलनमा छौ।’
सुनको भन्सार ६ प्रतिशत कायम गर्नुपर्ने तथा सुनचाँदीको कारोवारको लागि प्रष्ट नीति नियमावली निर्माण लगायतका माग राखि आन्दोलन गरेका थिए ।