महेन्द्रनगर नमुना मावि साधारण ‘उत्कृष्ट विद्यालय पुरस्कार २०८२’ बाट पुरस्कृत हुदै

महेन्द्रनगर–कञ्चनपुर जिल्लाको महेन्द्रनगर नमुना मावि साधारण सामुदायिक विद्यालयहरुका प्रधानाध्यापकहरुको साझा छाता संगठन पान(PAN:principals association of Nepal)ले प्रत्येक बर्ष प्रदान गर्दै आईरहेको ‘उत्कृष्ट विद्यालय पुरस्कार २०८२’बाट पुरस्कृत हुने भएको छ । जिल्लाको भीमदत्त नगरपालिका वडा नं. १८ कटानस्थीत महेन्द्रनगर नमुना मावि सुदूरपश्चिमकै उत्कृष्ट विद्यालयकोरुपमा यहि जेठ २३ गते ‘उत्कृष्ट विद्यालय पुरस्कार २०८२’बाट पुरस्कृत हुने भएको हो । विद्यालयले उत्कृष्ट विद्यालयका रुपमा प्रमाण पत्र र नगद प्राप्त गर्नेछ ।
पानले ‘बर्षको उत्कृष्ट विद्यालय पुरस्कार २०८२’ प्रदान गर्न गठन गरेको प्रा.डा. विद्यानाथ कोईरालाको नेतृत्वमा गठित मूल्यांकन समितिले गरेको मूल्यांकनका आधारमा महेन्द्रनगर नमुना माविलाई सुदूरपश्चिमकै उत्कृष्ट विद्यालय घोषणा गरिएको जानकारी दिएको छ । मूल्यांकन समितिले २५ वटा शैशिक मापदण्डका आधारमा मूल्यांकन गर्दै महेन्द्रनगर माविलाई सुदूरपश्चिम प्रदेशकै बर्षको उत्कृष्ट विद्यालय घोषणा गरेको प्राडा कोईरालाले जानकारी दिए ।

महेन्द्रनगर नमुना मावि साधारणमा झण्डै तिन हजार विद्यार्थी अध्ययनरत छन् ।

पानका अध्यक्ष सुदाम प्रसाद गौतमका अनुसार महेन्द्रनगर माविलाई जेठ २३ गते पोखरामा हुने पानको दास्रो राष्टिय सम्मेलन २०८२को अवसरमा उक्त पुरस्कार प्रदान गरीनेछ । प्रत्येक प्रदेशबाट एक एक आधारभूत र माध्यमिक तहका उत्कृष्ट विद्यालय, प्रत्येक प्रदेशबाट एक एक जना आधारभूत र माध्यमिक तहका प्रधानाध्यापक, प्रत्येक प्रदेशबाट एक एक उत्कृष्ट नगरपालिका वा गाउँपालिका, मुलुकभरबाट एक उत्कृष्ट महानगरपालिका वा उपमहानगरपालिकालाई अर्वाड प्रदान गर्न लागेको प्यानका अध्यक्ष सुदाम गौतमले जानकारी दिए । सम्मेलनमा देशभरका एकहजार बढी शिक्षाविद्, नीति निर्माता, प्रधानाध्यापक, शिक्षक र विद्यार्थीहरुको सहभागिता रहने पानका अध्यक्ष सुदाम प्रसाद गौतमले जानकारी दिए ।