पूर्व मुख्यमन्त्री रावलको पुस्तक भारतको एसएसजे विश्वविद्यालयका विद्यार्थीहरुले अध्ययन गर्ने

महेन्द्रनगर – सुदूरपश्चिमका पूर्वमुख्यमन्त्री एव नेकपा एमालेका नेता राजेन्द्र सिंह रावलको ऐतिहासिक पुस्तक भारतको एसएसजे विश्वविद्यालयका विद्यार्थीहरुले अध्ययन गर्ने भएका छन् । एमाले पोलिटव्यूरो सदस्इ रावलको पुस्तक विश्वविद्यालयले पाठ्यक्रममा सूचीकृत गरेसंगै उक्त विश्वविद्यालयमा पढ्ने विद्यार्थीहरुले पढ्ने भएका हुन् । उत्तराखण्ड भारतको अल्मोडास्थीत शोबनसिह जिना युनिभर्सिटी (एएसजे)को ‘इतिहास, संस्कृति तथा पुरातत्त्व विभाग’ले रावलद्वारा लिखित पुस्तक ‘दी हिस्ट्री अफ मिडिभल डोटी (मध्यकालीन डोटीको इतिहास)’ लाई पाठ्यक्रममा राखेको छ । विभागका प्रमुख डा. गोकुल सिंह देउपाले पूर्व मुख्यमन्त्री रावललाई मंसिर २३ गते एक पत्र पठाउँदै उक्त पुस्तक विश्वविद्यालयको पाठ्यक्रममा राखिएको जानकारी दिएका छन् ।
देउपाद्वारा लिखित पत्रमा भनिएको छ ‘तपाइको पुस्तक दी हिस्ट्री अफ मिडिभल डोटीलाई विश्वविद्यालयको सन्दर्भ पुस्तकको रूपमा सूचीकृत गरिएको जानकारी गराउन पाउँदछ हामी खुसी छौ । ’रावललाई लेखिएको पत्र अनुसार विश्वविद्यालयको विशेषज्ञ अध्ययन समितिको स्वीकृतिपछि कार्यान्वयनमा जानेछ । अंग्रेजी भाषामा प्रकाशित पुस्तक लेख्न रावलले डेढ दशक अनुसन्धान गरिएको बताए ।

‘मैले १७ वर्ष अनुसन्धान गरेर लेखेको पुस्तक हो । एसएसजे विश्वविद्यालयले सन्दर्भ सामाग्रीमा सूचीकृत गर्न लागेको थाहा पाउँदा खुसी लागेको छ’ एमाले नेता समेत रहेका रावल भन्छन् ‘भारतको उत्तराखण्डसम्म फैलिएको मध्यकालीन डोटी राज्यको इतिहासबारे विस्तृत रूपमा समेटिएको छ ।’
यो पुस्तकलाई सुदूरपश्चिम विश्वविद्यालयले समेत गत वर्षदेखि सन्दर्भ सामाग्रीको रूपमा राखेको छ । यसपनि विभिन्न क्षेत्रमा साहित्य, ऐतिहास लेखमा रावलको भूमिका रहेका छन ।