दार्चुलाको नौगाडमा अटो खस्दा दुई जनाको मृत्यू, एक बेपत्ता

दार्चुला–दार्चुलाको नौगाड खोलामा अटो खस्दा दुई जनाको मृत्यु भएको छ भने एक जना बेपत्ता भएका छन् । नौगाड गाउँपालिका–५ स्थित सौकेबगर नजिकै सोमबार साढे १ बजेको समयमा म १ ह ११४८ नम्बरको अटो नौगाड खोलामा खसेको दार्चुलाका प्रहरी निरीक्षक छत्रबहादुर रावतले बताए ।
रावतका अनुसार मृत्यु हुनेको पहिचान खुल्न सकेको छैन । अन्य दुई जना महिला भने बेपत्ता छन् । बेपत्ता एक जनाको खोजी कार्य जारी छ ।
रावतले भने, ‘अटोमा चालकसहित ५ जना सवार थिए । ५ जना मध्ये चालक मणिराज भुल र उनका छोरा आयुष भुल सकुशल छन् । आयुषको हात भाँचिएको छ ।’
होपरी गाडबाट गोकुलेश्वर तर्फ आइरहेको अटो अनियन्त्रित भएर सडकबाट करिब ५० मिटर तल खोलामा खसेको उनले बताए । चालक मणिराजलाई नियन्त्रणमा लिएर थप अनुसन्धान भइरहेको उनले बताए ।