जेनजी आन्दोलनबाट प्रभावित व्यवसायीलाई कञ्चनपुर उद्योग बाणिज्य संघको राहत

महेन्द्रनगर – जेनजी आन्दोलनबाट प्रभावित महेन्द्रनगरका पाच जना व्यवसायीलाई कञ्चपनुर उद्योग बाणिज्य संघले आर्थिक सहयोग गरेको छ । कञ्चनपुर उद्योग वाणिज्य संघले गत २४ भदौँ जेनजी आन्दोलनका क्रममा क्षती पुगेका २५ हजारका दरले राहत सहयोग गरेको हो ।
कञ्चनपुर उद्योग वाणिज्य संघका प्रमुख कार्यकारी अधिकृत हेमराज भट्टले न्यू रोयल टेलरिङ्ग ब्राण्ड, गल्सब्यूटी होम, श्रीराम होजियारी उद्योग, मेलौली होजियार उद्योग र रत्नमणी टे«डर्सका संञ्चालकलाई २५ हजारका दरले राहत सहयोग उपलब्ध गराईएको बताए ।

कञ्चनपुर उद्योग वाणिज्य संघका अध्यक्ष पिताम्बर जोशीले जेनजी आन्दोलनको क्रममा क्षति व्यहोरेका उद्योगी, व्यवसायीहरुका घाउमा मलम लगाउने उदेश्यका साथ सक्दो राहत सहयोग गरेको बताए । अध्यक्ष जोशीले जेनजी आन्दोलनका क्रममा निजी, व्यवसायी क्षेत्रमा भएको लुटपाट, आगजनी, तोडफोडले कञ्चनपुर सहित देशकै व्यापार व्यवसायी घरासायी भएकाले अब व्यापार बृद्धि विकासका लागि सबैले चिन्ता चासो व्यक्त गर्नुपर्ने बताए ।
२३ भदौँमा तत्तकालिन सरकार पक्षले युवा विद्यार्थीको गोली हानेर हत्या गरेको बिरोधमा २४ भदौँमा देशभर भएको जेन्जी आन्दोलनका क्रममा कञ्चनपुरमा समेत निजी, व्यवसायी, सरकारी, सार्वजनिक क्षेत्रमा लुटपाट, आगजनी, तोडफोड भएर ठुलो क्षति बेहोर्नु परेको थियो ।