कोरोना कहरमा पनि माक्स लगाएरै सुनापति महादेवको दर्शन धुमधामले सम्पन्न

रामेछाप।सुनापति गाउँपालिकाको चर्चित धार्मिक एवं पर्यटकिय स्थल  सुनापति डाँडामा जनैपूर्णिमाका दिन वर्षेनी मनाइने पूर्णिमा पर्व स्थानीयले कोरोना संक्रमण जोखिम हुँदाहुँदै पनि परम्परा जर्गेना गर्न माक्स लगाएरै धुमधाम साथ मनाएका छन् ।

परम्परादेखि मनाउँदै आइएको जनैपूर्णिमा पर्व कोरोना महामारीका बीच गाउँपालिका भित्रका विभिन्न स्थानबाट धामी झाक्री, भक्तजनहरु सुनापतिस्थित सुनापति महादेवको मन्दिरमा पुगेर दर्शन गर्दा आफ्नो मनले सोचिएको मोनकांक्षा पूरा हुन्छ भन्ने जनविश्वास रहीआएको छ ।त्यसले गर्दा काभ्रे, दोलखा, रामेछाप, काठमाडौँ लगायतका ठाउँबाट हजारौँ श्रद्धालु भक्तजनहरु महादेवको दर्शन गर्न आउने गरेको पाइन्छ ।

पर्यटकीय क्षेत्रको रुपमा विकास गरिएको सुनापति डाँडामा महादेवको दर्शनसँगै घुमघामका लागि हजारौ आन्तरिक तथा बाह्य पर्यटक यही अवसरमा सुनापति डाँडामा पुग्ने गर्छन् । सुनापतिमा महादेवको दर्शनका लागि यस वर्ष करिब १०० जना धामीझाँक्री र ५,६ सय जना  श्रद्धालु, भक्तजनहरुले महादेवको दर्शन गरिएको छ । स्थानीयका अनुसार गत वर्षमा भन्दा यस वर्ष महादेवको दर्शन गर्ने धामीझाँक्री र  श्रद्धालु, भक्तजनहरु केही कम भएको बताउनुभयो । 

सुनापति गाउँपालिका ३ नं. वडा अध्यक्ष बाबुराम तामाङले महादेवको दर्शन रोक्न नमिल्ने भएकाले स्वास्थ्य र सुरक्षाका सबै मापदण्ड पालना गरि भीडभाड हुने गतिविधि रोक्न र दर्शनलाई औपचारिकता दिनेगरी काम गराउन भनि निर्देशन गरिएको बताए । महादेवको दर्शन गर्दा हुने सम्भावित भीडलाई व्यवस्थित गर्न प्रहरी पनि परिचालन गरेका थियौँ’ अध्यक्ष तामाङले भने, यस्तो बेलामा स्वयम् नागरिकहरु पनि सचेत र जिम्मेवार बन्नुपर्छ, दर्शन अर्को पटक गर्न पनि सकिन्छ ।’