कञ्चनपुरका पालिकाकाहरुले कसले कति बजेट ल्याए ?

महेन्द्रनगर–कञ्चनपुर जिल्लाका नौ वटै स्थानीय तहले आगामी आर्थिक वर्ष २०८२।०८३ का लागि नीति, कार्यक्रम र बजेट ल्याएका छन् । कञ्चनपुर जिल्लाका पालिकाहरुले गतविगत बर्षझै यस बर्ष पनि विगत बर्षहरुका कार्यक्रममलाई निरन्तरता दिईएको पाईएको छ । नौ वटै पालिकाको बजेट जोड्दा ७ अर्ब नाघेको छ । सबैभन्दा बढि भीमदत्त नगरपालिकाको छ भने सबैभन्दा कम लालझाडी गाउँपालिकाको रहेको छ । भीमदत्त नगरपालिकाले १ अर्ब ९३ करोड रुपैयाँको बजेट विनियोजन गरेको छ भने लालझाडी गाउपालिकाले ४३ करोड रकम मात्रै नगरसभाबाट पारित गरेको छ ।

कञ्चनपुर जिल्लाको सबैभन्दा पुरानो नगरपालिका भीमदत्त नगरपालिकाले मंगलबार १७औँ नगर सभामार्फत १ अर्ब ९३ करोड रुपैयाँको बजेट पारित गरेको छ । नगरपालिकाले छोरी बुहारीलाई उच्च शिक्षामा छात्रवृत्ति उपलब्ध गराउने कार्यक्रमसहित शिक्षा, स्वास्थ्य र कृषि क्षेत्रलाई प्राथमिकता दिएको जनाएको छ ।

कृष्णपुर नगरपालिकाले १७औ नगर सभाबाट १ अर्ब १ करोड रुपैयाँ बराबरको बजेट पारित गरेको छ भने वेदकोट नगरपालिकाले १७औ नगर सभाबाट ९८ करोड ६५ लाख बराबरको बजेट पारित गरेको छ । दुवै नगरपालिकाले शिक्षा र स्वास्थ्य लगायतका सामाजिक सेवा क्षेत्रमा प्राथमिकता दिएको बताइएको छ ।

त्यसैगरी शुक्लाफाँटा नगरपालिकाले २०औ नगर सभाबाट९२ करोड रुपैयाँ बराबरको बजेट र पुनर्वास नगरपालिकाले १७औ नगर सभाबाट ७५ करोड ७७ लाख बराबरको बजेट पारित गरेका छन् । बेलडाँडी गाउँपालिकाले १७औ गाउँ सभाबाट ५४ करोड ५० लाख रुपैयाँको बजेट पारित गरेको छ । गाउँपालिकाले अढाई दशकयता दलदलमा परिणत भएको डेढ हजार बिघा भन्दा बढी खेतीयोग्य जमिनलाई पुनरुत्पादन लागि ठोस कदम चाल्ने जनाएको छ ।

यसअघि बेलौरी नगरपालिका १५औ नगर सभा र दोधाराचाँदनी नगरपालिकाले आइतबार १४औ नगर सभा सम्पन्न गर्दै दुवैले ७६ करोड रुपैयाँ बराबरको बजेट पारित गरेका थिए । बाढीका कारण डुबानको जोखिममा पर्ने यी दुवै पालिकाहरूले विपद् व्यवस्थापन र पूर्व तयारीमा विशेष प्राथमिकता दिएको जनाइएको छ ।

लालझाडी गाउँपालिकाले भने शुक्रबार नीति तथा कार्यक्रम र सोमबार १७औ गाउँ सभाबाट बजेट सार्वजनिक गर्दै ४३ करोड ६५ लाख रुपैयाँको बजेट पारित गरेको छ ।