अमरगढी किल्लाको कोतघर निर्माण गरिदै

डडेल्धुरा–डडेल्धुरा जिल्लामा रहेको ऐतिहांसिक अमरगढी किल्लामा कोतघर निर्माणको काम थालिएको छ । जिल्ला सदरमुकाम अमरगढी नगरपालिका ५ मा अवस्थित अमरगढी किल्लामा डेढ करोड लागतमा कोतघरसंगै किल्ला भित्र र बाहिर पत्थर बिछाउनेगरि नेपाली सेनासंग ठेक्का सम्झौता भई असारको अन्तिम साताबाट कोतघर निर्माणको कार्य सुरु गरीएको हो । गत आर्थिक बर्ष २०८१÷०८२ मा बजेट विनियोजन गरीएको भएता पनि आर्थिक बर्षको अन्तिममा आएर बजेट सुनिश्चितता भएपछि निर्माण कार्य सुरु गरीएको शहरी विकास तथा भवन निर्माण विभाग, संघीय आयोजना कार्यान्वयन इकाई धनगढीका प्राबिधिक दिपक ओझाले बताए । उनका अनुसार बजेट ढिला गरि प्राप्त भएपछि असार महिनाको पहिलो साता मात्रै ठेक्का सम्झौता भएको थियो । गत आर्थिक वर्षमा काम नसकिने निश्चित भएपछि म्याद थप गरि चालु आर्थिक वर्ष २०८२÷०८३ मा निर्माण कार्य सम्पन्न गर्ने लिईएको उनले बताए ।

नेपाली सेनाको अमरगढी नगरपालिका १ दहमा रहेको अर्जुनवाण गण र कार्यालयले साईड क्लियर गरि ठेक्का सम्झौता गरेको प्राबिधिक ओझाले जानकारी दिए । अहिले कोतघर निर्माणका लागि फाउन्डेसनको कार्य मात्रै सकिएको उनले बताए । किल्ला क्षेत्र विकास समितिका सदस्य श्याम सिंह सिनालले सेनाद्धारा पुनः कोतघर निर्माण भईरहेको जानकारी दिए ।

पुरानो कोतघरको भग्नावषेश मात्रै रहेको अमरगढी किल्ला भित्र नेपाली सेनाको नागरिक सैनिक सम्बन्ध कार्यक्रम अन्तरगतको २० लाख रकम लागतमा २०७७ सालमा कोतघर निर्माण गरिएको थियो । सेनाले २० लाखमा निर्माण गरेको कोतघर निर्माण गरीएको एक बर्षमै भत्किनुका साथै जिर्ण भएपछि नयाँ कोतघर निर्माण गर्न प्रक्रिया बढाइएको थियो । उक्त कोतघरको निर्माणको बर्षदिनमै छत भत्किने अवस्थामा पुगेको थियो । ढुंगाले चिनाई गरि पत्थरले छानो छाईएको कोतघरको छानोको धुरीबासो लच्किएपछि भत्किने अवस्थामा पुगेको थियो ।

गत आर्थिक वर्षमा नेपाली सेनाको अर्जुनवाण गणले अमरगढी किल्ला भित्र प्रवेश गर्ने मुख्यद्धारको समेत जिर्णोदार गरेको थियो । सेनाले २५ लाख रकममा ठेक्का सम्झौता मार्फत सुरुङ मार्गमा सालको काठ लगाई बाटो निर्माण गरेकोमा काठका आडमा ठूला ढुंगाले बनेको किल्लामा काठ कुहिएपछि ढुंगा भत्किने अवस्थामा पुगेका छन । केही ठाउँमा भत्किएका पनि छन । सुरुङ मार्गमा काठ लगाईएको किल्ला क्षेत्र विकास समितिका अध्यक्ष प्रविन जैरुले जानकारी दिए । उनका अनुसार सेनाले सुरुङ मार्गसंगै चौतारो निर्माण, आगनमा पत्थर लगाउने काम गरि रहेको छ ।