महेन्द्रनगर – अन्तर्राष्ट्रिय क्षेत्रमा सुरक्षाविद्को पहिचान बनाएका बौद्धिक व्यक्तित्व डा. दीपकप्रकाश भट्ट आसन्न प्रतिनिधिसभा निर्वाचनमा कञ्चनपुर निर्वाचन क्षेत्र नम्बर–३मा एमालेबाट उम्मेदवार बन्ने निश्चित भएका छन् । नेकपा एमालेको शनिबार बसेको सचिवालय बैठकले डा. भट्टलाई कञ्चनपुर–३ बाट प्रतिनिधिसभा सदस्यको उम्मेदवार बनाउने निर्णय गरेसंगै उनको उमेदवारी सुनिश्चित भएको हो ।
डा. भट्ट यसअघि २०७४ सालको प्रतिनिधिसभा निर्वाचनमा कञ्चनपुर–३ बाट नेपाली कांग्रेसका नेता रमेश लेखकलाई पराजित गर्दै निर्वाचित भएका थिए ।
एमालेभित्र मात्रै नभई बाहिर पनि बौद्धिक, शालीन र नीति–केन्द्रित नेताका रूपमा परिचित भट्टले अघिल्लो निर्वाचनमा गरेका चुनावी प्रतिबद्धताअनुसार उल्लेखनीय काम अघि बढाएका थिए । २०५६ सालदेखि बन्द रहेको मझगाउँ विमानस्थल पुनः सञ्चालन, महाकाली प्रादेशिक अस्पतालको सुधार, महाकाली कोरिडोरअन्तर्गत ब्रह्मदेब–कौवानी खण्डको निर्माण सुरु, तथा दोधारा–चाँदनीमा सुख्खा बन्दरगाह निर्माणको प्रक्रिया अघि बढाउनु उनका प्रमुख उपलब्धि हुन् ।
सरकारले २०६६ सालमा घोषणा गरेको सुख्खा बन्दरगाह निर्माणलाई प्राथमिकतामा राख्दै उनले चुनाव जितेपछि ठोस पहल गरेका थिए । सुरुमा कञ्चभोजमा निर्माण गर्न नदिने भन्दै विरोध भएपछि स्थान परिवर्तन गरी दोधारा–चाँदनी नगरपालिका–१ र २ मा सारेर निर्माण प्रक्रिया अघि बढाइएको थियो।
महाकाली नदीमा चार लेनको पक्की पुल तथा पहुँच मार्ग निर्माणमा समेत सांसद भट्टले सक्रिय भूमिका निर्वाह गरेका छन्। पुलको पहुँच मार्गका लागि आवश्यक जग्गा अधिग्रहणमा उनी दिनरात खटिएका थिए। त्यस्तै, महाकाली कोरिडोर निर्माण कार्यलाई आइई सम्पन्न गरी ठेक्का प्रक्रियामार्फत निर्माण चरणमा प्रवेश गराइएको छ।
परराष्ट्र र सुरक्षा मामिलाका जानकार डा. भट्ट विद्यार्थी राजनीतिबाट एमालेको राजनीतिमा आएका हुन्। उनले कैलालीको गेटास्थित मेडिकल कलेजलाई राष्ट्रिय चिकित्सा विश्वविद्यालयमा रूपान्तरण गर्ने अभियानसमेत अघि बढाएका छन्।
भारतको जवाहरलाल नेहरू विश्वविद्यालयबाट विद्यावारिधि हासिल गरेका डा. भट्ट पार्टीका नीतिगत, वैचारिक तथा अन्तर्राष्ट्रिय मामिलामा लामो समयदेखि सक्रिय छन्। २०४५ सालदेखि भारत प्रवासमा रहँदा अखिल भारत नेपाली स्वतन्त्र विद्यार्थी युनियनमार्फत संगठन निर्माणमा सक्रिय रहेका उनले महासचिव हुँदै २०५७ देखि २०६२ सम्म केन्द्रीय अध्यक्षको जिम्मेवारी निर्वाह गरेका थिए।
डा. भट्ट २०५२ सालमा एमालेको संगठित सदस्य बनेका हुन्। त्यसयता पिथौरागढ नगर कमिटी सचिव, दिल्ली राज्य कमिटी सदस्य, पार्टी राष्ट्रिय परिषद सदस्य, भारत प्रवास समन्वय कमिटी सदस्य लगायत विभिन्न जिम्मेवारी सम्हाल्दै संगठन विस्तारमा योगदान दिएका छन्। सम्पर्क विभाग, विदेश विभाग र महाकाली अञ्चल सम्पर्क कमिटीमार्फत पनि उनी पार्टीमा सक्रिय रहँदै आएका थिए।
२०४६ सालको जनआन्दोलनका क्रममा पिथौरागढमा नेतृत्वदायी भूमिका निर्वाह गरेका भट्टसँग राज्य सञ्चालन र नीति निर्माणको अनुभवसमेत छ। संघीय संसद्को अन्तर्राष्ट्रिय सम्बन्ध समितिको सदस्यका रूपमा उनले परराष्ट्र नीति, कूटनीति र अन्तर्राष्ट्रिय सम्बन्धका विषयमा सक्रिय भूमिका निर्वाह गरेका थिए। साथै, २०७२ देखि २०७४ सम्म उच्चस्तरीय परराष्ट्र नीति पुनरावलोकन कार्यदलको सदस्यका रूपमा पनि उनले काम गरेका थिए।
शान्ति प्रक्रियामा पनि उनको भूमिका उल्लेखनीय छ। २०६५ देखि २०६९ सम्म माओवादी सेनाका लडाकुहरूको रेखदेख, समायोजन र पुनःस्थापनासम्बन्धी विशेष समितिको सचिवालय सदस्यका रूपमा उनले काम गरेका थिए। २०७३ सालदेखि नेपाल सरकारद्वारा गठन गरिएको राष्ट्रिय विकास परिषद्को सदस्यका रूपमा समेत उनी कार्यरत रहे ।
डा. भट्ट आगामी निर्वाचनमा पुनः विजयी हुनेमा विश्वस्त देखिएका छन् ।
परशुराम मिडिया प्रालि.द्धारा सञ्चालित नयाँ खवर डटकमले समाचार, विचार, मनोरन्जन, खेल, विश्व, सुचना प्रविधि, भिडियो तथा जीवनका बिभिन्न आयामका समाचार र विश्लेषण समेट्छ । मर्यादित समाज विकास र उन्नतीको पथमा अगाडी बढ्ने उदेश्यका साथ आवाज बिहीनहरुको आवाज बनेर बाहिर प्रस्फुटन हुन नसकेको सत्य तथ्य, निष्पक्ष समाचार संप्रेषण गर्न सधै प्रतिबद्धछौ । भ्रस्टाचार, अनियमितता सम्बन्धी कुनै अडियो भिडियो तपाई संग छ भने हामीलाई उपलब्ध गराउनुहोस र जिम्मेवार नागरिकको दायित्व पुरा गर्नुहोला, श्रोत गोप्य राखिने छ ।
