नेकपा माओवादीको कम्युनमा प्रहरीको छापा, विस्फोटक पदार्थ बरामद

काठमाण्डौ – नेत्रविक्रम चन्द(विप्लव)नेतृत्वको नेपाल कम्युनिस्ट पार्टी(माओवादी)को अर्घाखाँचीस्थित कम्युनमा विस्फोटक पदार्थ बरामद भएको छ । शुक्रबार अर्घाखाँची शितगंगा नगरपालिका–११ बोक्सेमा जिल्ला प्रहरी प्रमुख डिएसपी दिवसबहादुर जिसीको कमान्डमा गस्ती गर्दा कोही नबस्ने गोठबाट भरूवा बन्दुक र ग्रिनेड लगायतका विस्फोटक पदार्थ फेला परेका हुन् ।
भरूवा बन्दुक दुई थान, ग्रिनेड १४ वटा, डेटोनेटर १२ वटा, लामो लन्चर जस्तो देखिने प्लास्टिकको पाइप ३ वटा, पाँच लिटरको प्रेसर कुकर बम एउटा, स्टिलको बम एउटा, बिजुलीको तार ४ बन्डल, बारूद ५०० ग्राम फेला परेका छन् । भरूवा बन्दुक बाहेक अन्य विस्फोटक पदार्थ नेपाली सेनाको सहयोगमा शुक्रबार नै डिस्पोज गरिएको प्रहरीले जानकारी दिएको छ ।
नेकपा माओवादीका प्रवक्ता खड्गबहादुर विश्वकर्मा(प्रकाण्ड)ले भने कम्युनमा छापा मारिएको घटनालाई ‘राज्यको श्वेत आतंक’ को संज्ञा दिएका छन्।
उनले अर्घाखाँचीको शितगंगा नगरपालिका–११ स्थित पार्टीले सञ्चालन गरेको कम्युन र सर्वसाधारणको घरमा छापा मारेर ‘श्वेत आतंक’ मच्चाएको दाबी गरेका छन् ।
उनले विज्ञप्ति जारी गर्दै भनेका छन्, ‘सरकारले एकातिर शान्तिपूर्ण चुनावको वातावरण बनाउने भनी प्रचार गर्ने, अर्कातिर माओवादीका उत्पादन केन्द्र र सर्वसाधारण जनताका घरमा छापा मार्ने कार्यले राज्य शान्तिपूर्ण निकास चाहँदैन, बरू देशलाई अशान्तितिर धकेल्न चाहन्छ भन्ने पुष्टि भएको छ।’