एमाले महिला संघको छाउपढी गोठसंगै कुरीती मनैदेखि जरा उखेल्न सिडियोलाई ज्ञापन पत्र

महेन्द्रनगर–नेकपा एमाले सम्बद्ध अखिल नेपाल महिला(अनेम) संघले छाउपढी गोठ भत्काउनु पर्ने माग गर्दै जिल्ला प्रशासन कार्यालय कञ्चनपुरलाई ज्ञापन पत्र बुझाएको छ । बुधबार अनेम संघ कञ्चपनुरका जिल्ला अध्यक्ष चिनी गिरीको नेतृत्वमा संघले प्रमुख जिल्ला अधिकारी लक्ष्मण ढकाललाई छाउपढी गोठ भत्काउन माग गर्दै ज्ञापन पत्र बुझाएको हो ।
कृष्णपुर नगरपालिका १ निगालीका २८ वर्षीय कमला आउजी दमाइको शनिबार छाउगोठमा सर्पले टोकेर मृत्यु भएको थियो । त्यसपछि छाउपढी गोठको बारेमा राष्ट्रिय अन्तराष्ट्रिय स्तरमै आवाज उठिरहको छ । संघले मंगलबार प्रेस विज्ञप्ति जारी गदैँ छाउगोठ भत्काउने अभियानमा सक्रिय हुन सबै नेता कार्यकर्तालाई अपील समेत गरीसकेको छ ।
अनेम संघ कञ्चनपुरकी अध्यक्ष चिनि गिरीले महिलालाई दोस्रो दर्जाको नागरीक बनाउने छाउपडी प्रथाको अन्त गर्न प्रमुख जिल्ला अधिकारीलाई ज्ञापन पत्र बझाएको बताईन् । ‘छाउपडी प्रथा नारीलाई दोस्रो दर्जाको नागरिक बनाउने, उसको आत्मसम्मान कुण्ठित गर्ने र जीवन नै जोखिममा पर्ने कुप्रथा भएकाले महिलाको मौलिक अधिकार सुनिश्चत गर्न र समानतामूलक समाज निर्माण गर्न छाउगोठ जस्ता कुरीति अन्त्यका लागि सिडियोलाई ज्ञापन पत्र बुझाएका छौ,’ उनले भनिन्, ‘सिडीयो पनि सकारात्म हुनुहुन्छ, यो अभियानमा उहाँले साथदिनुहुन्छ ।’

छाउपढी गोठमा बस्नु पर्ने रुढीवादी परम्परा अन्त्य हुने गरी गोठ भत्काउनु पर्ने माग राखेको संघका नेता गीता ओलीले बताईन । कृष्णपुर छाउपडि गोठमा सुतेको बेलामा सर्पको टोकाइबाट ज्यान गुमाउनु भएको घटनालाई लिएर अब उपरान्त यस्ता रुढीवादी परम्पराको अन्त्य हुनु पर्छ, यस्ता किसिमका कुरीतिहरु विरुद्ध सम्बन्धित निकायको पनि समयमा ध्यान जाओस,’ उनले भनिन्, ‘समाजमा जरा गाडेर बसेका ज्यान मारा रुढीवादी परम्पराको जरै बाट अन्त्य गरिनु पर्छ, छाउपढी गोठ मात्र होइन, यसलाई दिमामबाटै यसको जरा उखेलिनु पर्छ र सबै पालिकामा बनाइएका छाउपडि गोठ दिमागबाट नै भत्काइनु पर्छ भन्ने हाम्रो माग हो ।’
अनेम संघले कृष्णपुरको घटनाबाट सचेत हुँदै अब उप्रान्त यस्ता घटना नहुने गरि कामको थालनी गर्न संघीय सरकार, प्रदेश सरकार र स्थानीय सरकार सहित सरोकारवाला सबै निकायहरुको ध्यानाकर्षण समेत गराएको छ ।
शनिबार निगालीमा महिलाको ज्यान गएपछि फेरि गोठ भत्काउने अभियान सुरु गर्न लागिएको छ । प्रमुख जिल्ला अधिकारी ढकालले यसका लागि सबै स्थानीय तहलाई अभियान सञ्चालन गर्न पत्राचार गरी आग्रह गरेको बताए ।