एमालेमा ओलीको नेतृत्व अपरिहार्यः सचिव भट्ट

महेन्द्रनगर–नेकपा एमालेका सचिव लेखराज भट्टले अध्यक्ष केपी शर्मा ओलीको नेतृत्वलाई देवत्वकरण होइन, वर्तमान राजनीतिक परिस्थितिको आवश्यकता भएको बताएका छन् । शनिबार प्रेसचौतारी सुदूरपश्चिम प्रदेश समितिले महेन्द्रनगरमा आयोजना गरेको प्रशिक्षण भेलाको समुद्धघाटन कार्यक्रममा बोल्दै भट्टले उक्त कुरा बताएका हुन् ।

भट्टका अनुसार ओलीलाई चाँडै बुझ्न कठिन भए पनि उनले चालेका कदमको अर्थ पछि मात्र स्पष्ट हुने अद्भुत क्षमता छ । ‘ओलीलाई समर्थन गर्नु अहिलेको वस्तुस्थिति हो, व्यक्तिपूजाबाट प्रेरित होइन,’ भट्टले भने ।
नेकपा(एमाले) सुदूरपश्चिम प्रदेश इन्चार्ज समेत रहनु भएका भट्टका अनुसार एमाले हाल वैचारिक र सैद्धान्तिक रूपमा मुलुकको कम्युनिष्ट आन्दोलनको केन्द्र हो र यो सम्भव बनाउने नेतृत्व ओलीकै हातमा छ । ‘राष्ट्रियताका लागि अहिलेको नेतृत्व केपी ओली हो र हुनुहुन्छ। शक्ति, संगठन र समर्थनमा एमाले एक नम्बर पार्टी हो,’ उनले दाबी गरे ।

‘एमालेभित्र केही आन्तरिक समस्या रहेको स्वीकार गर्दै भट्टले सुधारका लागि पार्टीले आत्मसुधारमा ध्यान दिनुपर्ने छ । ओलीजस्तो खट्ने, सपना देख्ने र सक्रिय रहने नेता नेपालमा छैन,’ राष्ट्रपति संस्थाको गरिमा जोगाउने प्रतिबद्धता व्यक्त गर्दै उनले थपे, ‘राष्ट्रपतिलाई सम्मानित भएर बस्न हामीले भइसकेका छौँ। गणतन्त्रको गरिमा र गौरवका रूपमा हामीले सम्मान गर्ने निर्णय गरिसकेका छौँ।’
प्रेस चौतारी नेपाल सुदूरपश्चिम प्रदेश कमिटीको प्रशिक्षण कार्यक्रममा बोल्दै इन्चार्ज भट्टले बैठकमा समर्थन बाहिर बिरोध गर्ने कुराले अर्थ नरहने बताए । प्रशिक्षण तथा बैठक कंचनपुरको महेन्द्र नगरमा आयोजना गरिएको हो । पार्टी स्थायी कमिटी सदस्य भानुभक्त ढकाल, चौतारीका केन्द्रीय अध्यक्ष गणेश पाण्डे, एमाले पोलिटब्यूरो सदस्य निरुदेवी पाल, प्रदेश अध्यक्ष कृष्णप्रसाद जैशी, चौतारीका उपाध्यक्ष चेतन अधिकारी, महासचिव हिरामान लामा सहित सहभागि रहेको प्रदेश अध्यक्ष नरेन्द्र कार्कीले जानकारी दिए ।

कार्यक्रममा पोलिटब्युरो सदस्य निरुदेवी पालले केपी ओली विनाको एमाले, एमाले विनाको नेपाल र समृद्धिको कल्पना असम्भव भएको उल्लेख गरिन् । ‘यो सन्देश र समर्थनमा हरेक एमालेजन तयार छ । केन्द्रीय कमिटीको निर्णय नै विधान र महाधिवेशनको सार हो,’ पालले थपिन् । सुदूरपश्चिम प्रदेश कमिटी अध्यक्ष कृष्णप्रसाद जैशीले पार्र्टी निर्णयलाई सबैले मान्नु पर्नेमा जोड दिँदै भने, “त्यो लेलिनवादी सिद्धान्त र जबजको मूल मर्म भएकाले हल्ला र प्रचारबाजीको पछि लाग्नु नैतिक र सिद्धान्तबिहीन चरित्र भएको टिप्पणी गरे ।

बैठकमा प्रदेशस्तरीय र जिल्ला प्रतिनिधिहरूले स्थानीय चुनौती, अवसर र आगामी गतिविधिबारे सुझाव राखेका थिए। प्रेस चौतारी सुदूरपश्चिम प्रदेश अध्यक्ष नरेन्द्र कार्कीको अध्यक्षतामा भएको बैठक विभिन्न जिम्मेवारी बाँडफाँडसहित २०८२ सालभर सञ्चालन हुने अभियान बारे छलफल भएको छ ।