भीमदत्त नगरपालिकास्तरीय राष्ट्रपति रनिङ्ग शिल्ड प्रतियोगिताको शिल्ड नगरपालिकामै राखियो

महेन्द्रनगर – भीमदत्त नगरपालिका स्तरीय राष्ट्रपति रनिङ्ग शिल्ड छनौट प्रतियोगिताको शिल्ड नगरपालिका मै राखिएको छ । आईतबार कबर्ड हलमा गरिएको १६ औं राष्ट्रपति रनिङ्ग शिल्ड प्रतियोगिताको समापन गरीएता पनि पदक विवादकाकारण शिल्ड भने नगरपालिकामा फिर्ता ल्याईएको हो ।

समापन कार्यक्रममा विधागतरुपमा शिल्ड सहित विद्यार्थीलाई पदकहरु वितरण गरिएका छन् । समापन कार्यक्रममा प्रतियोगिताको विजेता विद्यालय घोषणा नगरी शिल्ड नगरपालिकामा ल्याईएको छ ।

प्रतियोगितामा उसु खेलको पदक गणनालाई लिएर विवाद भएको थियो । प्रतियोगिता निर्णायक समितिले राष्ट्रिय खेलकूद परिषद्को पत्रलाई वेवास्ता गरी पदक गणना नहुने निर्णय गरेपछि विवाद चर्किएको थियो ।

उसुका पदक सहित गणना भए बैजनाथ माध्यमिक विद्यालय सबैभन्दा बढी पदक भएर शिल्ड पाउनेछ । बैजनाथले जितेका पदक गणना नहुँदा सिद्धनाथ अमर मावि गड्डाचौकी पहिलो र पूर्णा मावि ऐरी दोस्रो स्थानमा छन् ।

गणना गरिएका पदकले सबैभन्दा बढी अंक पाएको सिद्धनाथ अमर माविलाई समेत शिल्ड दिइएको छैन । समापन कार्यक्रममा विद्यालयका शिक्षकहरुले शिल्ड पाउनु पर्ने माग राखेका थिए ।
सिद्धनाथ अमर माविका खेल शिक्षक नितेश रावलले सबैभन्दा बढी अंक भएकाले विद्यालयले शिल्ड पाउनु पर्ने माग राखेको बताए ।
आयोजकले भीमदत्तका मेयर पदम बोगटीबाट शिल्ड हस्तान्तरण गरिने भएकाले तत्काल नदिइएको जवाफ दिएको उनले बताए । ‘शिल्ड दिनु पर्ने माग राखेका थियौ, अब मेयर सापले बाँड्ने भन्ने कुराको जानकारी भयो’ उनले भने ।

गत वर्ष गड्डाचौकीले ६ महिनापछि शिल्ड पाएको थियो । उसुका पदक सहित गणना हुँदा सबैभन्दा बढी पदक पाएर बैजनाथ माविलाई शिल्ड दिइएको थियो । सिद्धनाथ अमर मावि सहितले प्रतिस्पर्धा नगरी एकलौटी रुपमा पदक दिइएको भन्दै विरोध गरी समापन कार्यक्रम बहिस्कार गरेका थिए । त्यसपछि भीमदत्तले दुबै विद्यालयसित छलफल गरी ६ महिनापछि बैजनाथबाट शिल्ड खोसेर गडडाचौकीलाई दिएको थियो ।

यस वर्ष प्रतियोगितामा ५ विद्यालयले भाग लिएका थिए । आयोजकले प्रतिस्पर्धा नभएको भन्दै पदक गणना नगरेपपछि बैजनाथले समापन कार्यक्रममा शिल्ड सहित पदक बहिस्कार गरेको छ ।
भीमदत्त नगरपालिकाका सामाजिक विकास समितिका संयोजक सुशिल कुमार भट्टले उसुका पदकलाई लिएर विवाद देखिएका कारण शिल्ड वितरण नगरिएको बताए । भीमदत्तका नगर प्रवक्ता अवस्थीले भने आफूलाई यसबारे थाहा नभएको बताए । भीमदत्तका नगर प्रवक्ता पदमराज अवस्थीको प्रमुख आतिथ्यतामा समापन कार्यक्रम गरिएको थियो ।