इन्धनकाे मूल्य वृद्धिले निर्माण उद्योगमा ‘आपतकाल’ घोषणाको माग

महेन्द्रनगर – पेट्राेलियम पदार्थकाे मूल्य बढेकाे भन्दै कञ्चनपुरका निर्माण व्यवसायीहरूले उद्योगमा ‘आपतकाल’ घोषणाको माग गरेका छन् ।

इन्धनमा अत्यधिक मूल्यवृद्धि भएका कारण निर्माण उद्योग ठप्प हुने स्थितिमा पुगेको भन्दै निर्माण व्यवसायीले आपतकाल घोषणाको माग गरेका हुन् ।
निर्माण व्यवसायी संघ कञ्चनपुरले विज्ञप्ति जारी गर्दै निर्माण उद्योग ठप्प हुने स्थितिमा पुगेको भन्दै सरकारको ध्यानाकर्षण गराएको छ । इन्धनमा तथा निर्माण कार्यमा प्रयोग हुने बिटुमिन, सिमेण्ट, छड लगायतका निर्माण सामग्रीमा समेत निरन्तरको मूल्य वृद्धि र बजारमा उक्त सामग्रीहरूको अभावले निर्माण उद्योग ठप्प हुने स्थितिमा पुगेको उल्लेख गर्दै निर्माण व्यवसायीलाई राहत दिन सरकार सँग जोडदार माग गरिएको छ ।
संघका महासचिव देविदत्त भट्टद्वारा हस्ताक्षरित विज्ञप्तिमा  निर्माण समाग्रीको अत्यधिक मूल्यवृद्धि भए पनि राष्ट्र बैंकको इन्डेक्समा उक्त सामग्रीको मूल्य घटेको देखाइने प्रचलनका कारण निर्माण उद्योगमा थप संकट देखिएको र सबै आयोजनामा मूल्य वृद्धि भए अनुरुप हालको कानुनले मूल्य समायोजन हुन नसक्ने भएकाले मूल्य समायोजनको मार्ग निर्देशिका तत्काल जारी गर्न सरकार सँग माग गरिएको छ ।
‘ठेक्काको मूल्य समायोजन राष्ट्र बैंकको मूल्य सूचकांकअनुसार हुने भएकाले बजारमा निर्माण सामग्रीहरूको अत्याधिक मूल्यवृद्धि भए पनि राष्ट्र बैंकको इन्डेक्समा उक्त सामग्रीहरूको मूल्य घटेको देखाइने प्रचलनका कारण निर्माण उद्योगमा थप संकट देखिएको छ,’ सचिव भट्टद्वारा जारी विज्ञप्तिमा भनिएको छ, ‘निर्माण कार्य तीव्र रूपमा हुने समयमै इन्धनसहित निर्माण सामग्रीहरूमा निरन्तर भइरहेका अत्यधिक मूल्यवृद्धि एवं अभावले निर्माण व्यवसायीहरूलाई ठूलो आर्थिक भार परेको हुँदा निर्माण उद्योगमा ‘आपतकाल’ घोषणा गरी व्यवसायीहरूलाई अविलम्ब राहत दिन यस जिल्लासंघ जोडदार माग गर्दछ ।’