महेन्द्रनगर । गृहमन्त्री रमेश लेखकले मुलुकमा स्थायी सरकार निर्माणका लागि दुई ठूला दल कांग्रेस र एमालेबीच सहमति भएको बताएका छन्। गृहमन्त्री बनेपछि गृहजिल्ला पुगेर मंगलबार आयोजित एक कार्यक्रममा उनले स्थायी सरकारको अवधारणा र सुशासन कायम राख्न दुई दलबीच सहमति आवश्यक रहेको स्पष्ट पारे।
लेखकले एमाले र कांग्रेसबीच भएको सात बुँदे सहमति कार्यान्वयनमा कुनै शंका नगर्न आग्रह गर्दै भने, “प्रधानमन्त्री र मुख्यमन्त्रीले हरेक तीन–तीन महिनामा विश्वासको मत लिनुपर्ने अवस्थाको अन्त्यका लागि यो सहमति भएको हो। मुलुकमा विशेष परिस्थिति सिर्जना भएको हुँदा राम्रो दिशा दिनका लागि दुई ठूला दल मिलेका हौँ।”
उनले नेपाली राजनीतिक इतिहासमा ठूला परिवर्तनका समयमा पनि यी दुई दल मिलेर अघि बढेको स्मरण गराउँदै, स्थायी सरकार बनेपछि विकास र सुशासनको मार्ग प्रशस्त हुने विश्वास व्यक्त गरे।
त्यसैगरी, लेखकले द्धन्द्धका बेला बन्द भएका देशभरका छोटी भन्सार कार्यालयहरू पुनः सञ्चालन गर्न सरकारले पहल गरिरहेको जानकारी दिए। उनले भने, “जहाँ–जहाँ भन्सारका कार्यालयहरू र जग्गा रहेका छन्, ती कार्यालयहरूलाई पुनः सुचारु गर्ने प्रयासमा छौं। भारततर्फ भन्सार कार्यालय नभएकाले केही चुनौती भए पनि छोटी भन्सार सञ्चालनका लागि प्रयास जारी छ।”
सरकारले स्थानीय तहमा सुशासन र प्रशासनिक सेवा सुदृढ बनाउनका लागि भन्सार प्रणालीलाई समेत सुधार गर्ने योजना रहेको उनले बताए।
परशुराम मिडिया प्रालि.द्धारा सञ्चालित नयाँ खवर डटकमले समाचार, विचार, मनोरन्जन, खेल, विश्व, सुचना प्रविधि, भिडियो तथा जीवनका बिभिन्न आयामका समाचार र विश्लेषण समेट्छ । मर्यादित समाज विकास र उन्नतीको पथमा अगाडी बढ्ने उदेश्यका साथ आवाज बिहीनहरुको आवाज बनेर बाहिर प्रस्फुटन हुन नसकेको सत्य तथ्य, निष्पक्ष समाचार संप्रेषण गर्न सधै प्रतिबद्धछौ । भ्रस्टाचार, अनियमितता सम्बन्धी कुनै अडियो भिडियो तपाई संग छ भने हामीलाई उपलब्ध गराउनुहोस र जिम्मेवार नागरिकको दायित्व पुरा गर्नुहोला, श्रोत गोप्य राखिने छ ।
