शुक्लाफाँटा नगरपालिकामा १६औं राष्ट्रपति रनिङ्गशिल्ड सम्पन्न, कालिका माविलाई उपाधी

महेन्द्रनगर– कञ्चनपुर जिल्लाको शुक्लाफाँटा नगरपालिकामा सञ्चालन भएको १६औँ राष्ट्रपति रनिङ्गशिल्ड छनोट प्रतियोगिताको उपाधी कालिका माध्यमिक विद्यालय असैनाले जितेको छ । शुक्लाफाँटा नगर खेलकुद विकास समितिको आयोजनामा बिहिवार देखि सुरु भएको प्रतियोगितामा ६ स्वर्ण, १ रजत र १ कास्यसहित ८ पदक हात पारेको कालिका मावि असैना प्रथम भएको हो । त्यसैगरी प्रतियोगितामा सुर्योदय माध्यमिक विद्यालय बन्शाहले ५ स्वर्ण, ९ रजत, र ७ कास्य सहित २१ पदक जित्दै दोस्रो स्थान हात पारेको छ । ४ स्वर्ण, ३ रजत, र ५ कास्य सहित १२ पदक हात पारेको धर्म जनता मा.वि स्टेसनपुर तृतीय भएको छ । शुक्लाफाँटा नगरपालिका वडा नं.०७ स्टेसनपुर स्थित धर्मजनता माध्यमिक विद्यालयको प्राङ्गणमा सनिवार औपचारिक कार्यक्रमका विच प्रतियोगिताको समापन गरीएको छ ।
प्रतियोगितामा नगरपालिका भित्रका संस्थागत विद्यालय २५ र सामुदायिक २८ गरि ५३ विद्यालयको सहभागीता रहेको थियो। खेलकुद प्रतिस्पर्धामा विभिन्न ४५ विधामा विद्यार्थीहरूले उत्साहजनक सहभागिता रहेको नगर खेलकुद विकास समितिका अध्यक्ष चक्र बहादुर साउँदले बताए ।
नियमित पठन–पाठनसँगै खेलकुद विद्यार्थीको सर्वाङ्गीण विकासको आधार भएको शुक्लाफाँटा नगरपालिका नगरप्रमुख रण बहादुर महराले बताए । नगर प्रमुख महराले ‘खेलकुदले विद्यार्थीको अनुशासन, नेतृत्व विकास गर्ने भएकाले विद्यार्थीहरूलाई यस क्षेत्रमा सक्रिय हुन आग्रह गरे । साथै, प्रतियोगिता स्वतन्त्र, निष्पक्ष र मर्यादित रूपमा सम्पन्न गर्न सहयोग गर्ने सबैलाई धन्यवाद दिदै नगर प्रमुख महराले १७औँ राष्ट्रपति रनिङशिल्ड प्रतियोगिता कालिका माविमा गर्ने घोषणा गरेका छन् ।

शुक्लाफाँटा नगर खेलकुद समितिका अध्यक्ष चक्र बहादुर साउदको अध्यक्षतामा भएको कार्यक्रममा नगर प्रमुख रण बहादुर प्रमुख अतिथि रहेका थिए । कार्यक्रममा शिक्षा शाखा प्रमुख टिकेन्द्रराज भट्ट, जनप्रतिनिधी, कर्मचारी खेलाडी खेलप्रेमी लगायतको सहभागिता रहेको थियो ।