पीडितसँग छलफल नगरी फर्कियो छानविन आयोगको टोली : नेकपा(एमाले) कञ्चनपुर

महेन्द्रनगर । छानबिन आयोगकोे कार्यशैलीलाई लिएर नेकपा एमालेले विरोध जनाएको छ । बिहिबार कञ्चनपुर आएको जाँचबुझ आयोगको टोलीले पीडित र सरोकारवालासँग छलफल नगरी फर्किएको भन्दै नेकपा (एमाले) कञ्चनपुरले गम्भीर आपत्ति जनाएको हो ।
एमाले कञ्चनपुरका सचिव पल्लब राज भट्टले शुक्रबार जारी गरेको विज्ञप्तिमा आयोगको टोलीले स्थानीय पीडित, सरोकारवाला तथा राजनीतिक दलहरूसँग छलफल नगरी “सुटुक्क फर्किएको” भन्दै यस्तो व्यवहारले आयोगको जिम्मेवारीप्रति गम्भीर प्रश्न उठेको उल्लेख छ ।
प्रेस विज्ञप्तीमा भनिएको छ, “नेकपा (एमाले) कञ्चनपुरको भवनमा आगजनी भएको कुरा राज्यलाई जानकारी छ कि छैन ? सरोकारवालाको छलफलमा आफ्नो आस्थाको धरोहर जलाइएका राजनीतिक दलहरूलाई नबोलाई उपस्थितिको माइन्युटमा दलको नाम लेखेर अनुपस्थित लेख्नुको अर्थ के हो ?”
एमालेले आयोगले केही व्यक्तिका घरमा गोप्यरूपमा पुगेर भेटघाट गर्ने, अरूलाई जानकारी नै नदिने र कतिपयलाई भेट्नै अस्वीकार गर्ने जस्ता कार्यले आयोग गैरजिम्मेवार रहेको स्पष्ट भएको आरोप लगाएको छ ।
त्यस्तै विज्ञप्तीमा भाद्र २३ गतेका घटनामा “घुसपैठियाहरूले आन्दोलनलाई उत्तेजित पार्न कलिला युवामाथि गोली प्रहार गरी हत्या गरेको” र “प्रहरीसँग नभएका हतियार प्रयोग भएको” दाबी गरिएको छ । पार्टीले २४ गते गरिएको आगजनी र तोडफोडलाई योजनाबद्ध र नियोजित कार्य भएको बताएको छ।

एमाले आयोगको हालको गतिविधिबाट “छानबिनको नाममा अपराधी जोगाउने प्रयास भइरहेको आशंका उत्पन्न भएको” भन्दै यस्तो कदम अस्वीकार्य हुने चेतावनी दिएका छन् ।
एमाले कञ्चनपुरले वर्तमान सरकारलाई भाद्र २३ र २४ गतेका घटनामा संलग्न अपराधीहरूलाई शीघ्र कानूनी कारबाहीमा ल्याउन, पीडितहरूलाई न्याय दिन ढिलाइ नगर्न, लुटिएका हतियार फिर्ता गर्न र समाजमा फैलिएको भय तथा आतंक अन्त्य गर्न समेत आग्रह गरेको छ । भाद्र २३ र २४ गते ‘जेन जी’ आन्दोलनका क्रममा कञ्चनपुर लगायत देशका विभिन्न ठाँउमा सरकारी, निजि र पार्टी कार्यालयहरुमा अराजक समुहले तोडफोड गरीएको थियो ।