पत्रकार महासंघ अध्यक्ष धामीको उपचार गर्न उद्योग बाणिज्य संघद्धारा ५१ हजार आर्थिक सहयोग

महेन्द्रनगर–कञ्चनपुर उद्योगबाणिज्य संघले पत्रकार महासंघ शाखा कञ्चनपुरका अध्यक्ष सुरेश सिंह धामीको उपचारका लागि आर्थिक सहयोग गरेको छ । बाणिज्य संघले प्यांक्रियाजको क्यान्सरको उपचार गरीरहेका पत्रकार महासंघ कञ्चपनुरका अध्यक्ष धामीको उपचारका लागि ५१ हजार रुपयाँ सहयोग गरेको हो । सोमबार बाणिज्य संघ कञ्चनपुरका अध्यक्ष पिताम्बर जोशीले पत्रकार महासंघ शाखा कञ्चनपुरका महिला उपाध्यक्ष धर्मा रोकायालाई उक्त रकमको चेक हस्तान्तरण गरेका हुन् ।

बाणिज्य संघ अध्यक्ष जोशीले बाणिज्य संघको बैठकमा पत्रकारमहासंघ उपाध्यक्ष रोकायालाई चेक हस्तान्तरण गरेका थिए । बैठकमा बाणिज्य संघका पदाधिकारी, कार्यसमिति सदस्यहरुको उपस्थीती रहेको थियो । बाणिज्य संघका अध्यक्ष जोशीले समाज परिवर्तन गर्न रातदिन खटिने पत्रकार धामीको उपचारका लागि बाणिज्य संघको तर्फबाट सक्दो सहयोग गरीएको बताए । पत्रकार महासंघको तर्फबाट उपाध्यक्ष धर्मा रोकायाले बाणिज्य संघ परिवारलाई सहयोगको लागि आभार प्रकट गर्दै धन्यवाद दिए । उनले अध्यक्ष धामीको उपचारका लागि संगठन सहित सबै क्षेत्रबाट उनको जिवन रक्षाका लागि सहयोग अपरिहार्य रहेको भन्दै थप उपचारका लागि सहयोगको अपिल गरेका छन् ।

नेपाल पत्रकार महासंघ जिल्ला अध्यक्ष धामी प्रेस चौतारी नेपाल कञ्चनपुरका संस्थापक अध्यक्ष एव अपिटुडे दैनिकका प्रकाशक हुन । दुई दशकदेखि पत्रकारिता गर्दै आएका धामी एक्कासी बिरामी भएपछि नेपालमा उपचार सम्भव नभएपछि भारतको गान्धी क्यान्सर अस्पतालमा उपचार गराईरहेका छन । उनको उपचारमा ठूलो धनराशीको आवश्यकता परीरहेको उनको परिवारीक स्रोतले जनाएको छ ।