नयाँ खबर
महेन्द्रनगर – बरिष्ठ पत्रकार खेम भण्डारीलाई कारागार चलान गरीएको छ । गाली बेइज्जती मुद्दामा अदालतको फैसला कार्यान्वयनका क्रममा बिहीबार बिहान ७ बजे भीमदत्त नगरपालिका–१८ बाट पक्राउ गरेका उनलाई कारागार चलान गरीएको हो । जिल्ला अदालत कञ्चनपुरले गाली बेइज्जती मुद्दामा पत्रकार भण्डारीलाई २०८२÷०२÷०१ गते १ महिना कैद सजाए र १० हजार जरिवानाको फैसला सुनाएको थियो । भण्डारीले मुलुकी फौजदारी कार्यविधि संहिता, २०७४ को दफा १५५ बमोजिम रकम बुझाई कैद मिलान गरिपाऊँ भन्दै कानुन व्यवसायीमार्फत कञ्चनपुर जिल्ला अदालतमा निवेदन दिएका थिए । तर न्यायाधीश राजेन्द्रसिंह भण्डारीको इजलासले उक्त माग अस्वीकार गरेपछि उनलाई कारागार चलाइएको तहसिलदार नारायणदत्त ओझाले जानकारी दिए ।
ओझाका अनुसार रकम बुझाएर कैद मिलान गर्ने व्यवस्था पहिलोपटक कैद सजाय पाएका प्रतिवादीका हकमा मात्र लागू हुने कानुनी प्रावधान छ। भण्डारी यसअघि पनि कैद सजाय पाइसकेकाले उक्त सुविधा प्राप्त गर्न नसकेको उनले बताए।
उच्च अदालत दिपायलको महेन्द्रनगर इजलासले २०८२÷१२÷२२ गते जिल्ला अदालतको फैसला केही उल्टी गर्दै थप ७ दिन कैद र २ हजार १०० जरिवाना थप गरिदिएको थियो । जसअनुसार पत्रकार भण्डारीले कुल १ महिना ७ दिन कैद सजाय र १२ हजार १०० जरिवाना तिर्नुपर्ने छ ।
पछिल्लो पटक निर्मला पन्तको बलात्कारपछि हत्या प्रकरणसँग सम्बन्धित विषयमा प्रकाशित समाचारलाई लिएर दायर भएको गाली बेइज्जती मुद्दामा कञ्चनपुर जिल्ला अदालतले २०८२ जेठ १ गते भण्डारीलाई दोषी ठहर गरेको थियो । जिल्ला अदालतले उनलाई एक महिना कैद, १० हजार रुपैयाँ जरिवाना र एक लाख रुपैयाँ क्षतिपूर्ति तिर्नुपर्ने फैसला गरेको थियो ।
किरण विष्टले कञ्चनपुरकी १३ वर्षीया बालिका निर्मला पन्तको बलात्कार र हत्या प्रकरणमा आफूलाई जोडेर भ्रामक समाचार लेखेको भन्दै पत्रकार भण्डारी विरूद्ध अदालतमा मुद्दा दायर गरेका थिए ।
किरण तत्कालीन एसपी तथा एसएसपीबाट रिटायर्ड दिल्लीराज विष्टका छोरा हुन् ।
यसअघि पनि निर्मला पन्त हत्या प्रकरणसँग सम्बन्धित अर्को मुद्दामा भण्डारीलाई एक घण्टा कैद र एक रुपैयाँ जरिवानाको सजाय भएको थियो।
वि।सं। २०७५ साउन १० गते साथीको घरमा पढ्न गएको भन्दै घरबाट निस्किएकी किशोरी निर्मला पन्त भोलिपल्ट भीमदत्त नगरपालिका–२ स्थित निम्बुखेडा खोलानजिकको उखुबारीमा मृत अवस्थामा फेला परेकी थिइन्। बहुचर्चित उक्त हत्या प्रकरणका वास्तविक दोषी अहिलेसम्म पहिचान हुन सकेका छैनन्।
कञ्चनपुरका प्रहरी प्रमुख एसपी नेत्रमणि गिरीका अनुसार पक्राउपछि पत्रकार भण्डारीलाई जिल्ला अदालत कञ्चनपुरमा पेस गरिएको थियो ।
परशुराम मिडिया प्रालि.द्धारा सञ्चालित नयाँ खवर डटकमले समाचार, विचार, मनोरन्जन, खेल, विश्व, सुचना प्रविधि, भिडियो तथा जीवनका बिभिन्न आयामका समाचार र विश्लेषण समेट्छ । मर्यादित समाज विकास र उन्नतीको पथमा अगाडी बढ्ने उदेश्यका साथ आवाज बिहीनहरुको आवाज बनेर बाहिर प्रस्फुटन हुन नसकेको सत्य तथ्य, निष्पक्ष समाचार संप्रेषण गर्न सधै प्रतिबद्धछौ । भ्रस्टाचार, अनियमितता सम्बन्धी कुनै अडियो भिडियो तपाई संग छ भने हामीलाई उपलब्ध गराउनुहोस र जिम्मेवार नागरिकको दायित्व पुरा गर्नुहोला, श्रोत गोप्य राखिने छ ।
