निङ्गलाशैनी माविको अध्यक्षमा ह्याट्रिक गरेका भट्ट फेरी अध्यक्ष चयन

महेन्द्रनगर – कञ्चनपुर जिल्लाको भीमदत्त नगरपालिका १८ गोबरस्थित निङ्गलाशैनी माध्यामिक विद्यालय व्यवस्थापन समिति अध्यक्षमा ह्याट्रिक गरेका निरञ्जन भट्ट फेरी चौथो कार्यकालका लागि पनि अध्यक्षमा चयन भएका छन् । शनिबार सम्पन्न विद्यालय व्यवस्थापन समिति सदस्यहरुको भेलाबाट कञ्चनपुर निर्माण व्यवसायी संघका निवर्तमान अध्यक्ष भट्ट चौथो पटक अध्यक्षमा सर्वसम्मत चयन भएका हुन् । चौथो पटक निङ्गलाशैनी माविको अध्यक्षमा निर्वाचित भएपछि भट्टलाई बधाईको ओईरो लागेको छ ।
भीनपा १५ गोबरैयका वासिन्दा भट्ट २०७२ देखि निरन्तर अध्यक्ष पद सम्हाल्दै आएका छन् । समाजसेवा र निर्माण व्यवसायमा आवद्ध उनले पहिलो पटक अध्यक्ष हुँदा विद्यालयलाई जग्गा विवादको समस्याबाट मुक्त गराएका थिए भने देशविदेशबाट सहयोग जुटाएर विद्यालयलाई प्रविधिमैत्री बनाएका थिए । विद्यालयको शैक्षिक र भौतिक विकासलाई प्राथमिकता दिएका उनले विद्यालयमा अंग्रेजी माध्यमबाट पठनपाठन सुरुवात गराएका हुन् ।
उदयदेव बहुउदेश्यीय सहकारी संस्थाका उपाध्यक्ष समेत रहेका अध्यक्ष भट्ट २०७९ मा जन सेवा श्री विभुषणबाट सम्मानित भएका थिए । चौथो पटक व्यवस्थापन समिति अध्यक्ष बनेका उनले विद्यालयको शैक्षिक भौतिक विकासलाई प्राथमिकता दिएर अघि बढ्ने बताए ।