डडेल्धुरा अस्पताललाई फेरि ‘प्रथम सेवा विन्दु’ कायम

डडेल्धुरा – स्वास्थ्य बीमा बोर्डले डडेल्धुरा अस्पताललाई आगामी असोज मसान्तसम्म ‘प्रथम सेवा विन्दु’ का रूपमा सेवा दिन अनुमति दिएको छ । स्वास्थ्य तथा जनसंख्या मन्त्रालयको निर्देशनअनुसार बोर्डले यसअघि हटाइएको प्रथम सेवा विन्दुको सुविधा फेरि बहाल गर्ने निर्णय गरेको हो । यसअघि बोर्डले २०८२ साउन १ गतेदेखि रेफरल अस्पतालले प्रथम सेवा विन्दुको रूपमा काम गर्न नपाउने भन्दै पत्राचार गरेको थियो ।
डडेल्धुरा अस्पतालबाट सेवा विन्दु हटाउने निर्णयपछि सामाजिक सञ्जालदेखि नागरिक तहसम्म स्थानीय तह र सेवाग्राहीको चर्को विरोधपछि स्वास्थ्य तथा जनसंख्या मन्त्रालयको पत्रको आधारमा बोर्डले फेरि असोज मसान्तसम्मका लागि सेवा निरन्तर गर्ने निर्णय गरेको छ ।
बोर्डका जनस्वास्थ्य अधिकृत विकेश मल्लका अनुसार डडेल्धुरा अस्पताललाई असोज मसान्तसम्म प्रथम सेवा विन्दुको रूपमा काम गर्न सक्ने गरी पत्राचार गरिएको छ। डडेल्धुरा अस्पतालले स्वास्थ्य बीमित नागरिकलाई पहिलो चरणमा सेवा दिने र आवश्यक परेमा रिफरलमार्फत अन्य अस्पतालमा सिफारिस पनि गर्न सक्नेछ ।