डडेल्धुरामा अटोको ठक्करबाट ४ वर्षीय बालकको मृत्यु

डडेल्धुरा – डडेल्धुरामा अटोको ठक्करबाट चार वर्षीय बालकको मृत्यु भएको छ । जिल्लाको आलिताल गाउँपालिका–८ स्थित गोदाम बजार नजिक बुडरबाट जोगबुडा गईरहेको भी.नं.पा. ००१ ह ०१२६ नम्बरको अटोले ठक्कर दिँदा आलिताल–४, कैनघाडीका ज्योती श्रेष्ठ विकका छोरा विवेक विकको मृत्यू भएको हो । 


अटो दुर्घटनाबाट घाईते भएका बालकको उपचारका लागि जोगबुडा अस्पताल लगिएकोमा उपचारको क्रममा मृत्यू भएको जिल्ला प्रहरी कार्यालय डडेल्धुराका सूचना अधिकारी प्रहरी निरीक्षक डम्मर विष्टले बताउनुभयो । आमा ज्योती श्रेष्ठ विकसँगै पैदल हिँडिरहेको अवस्थामा बालकलाई अटोले ठक्कर दिएको थियो । ठक्करपछि अटोले बालकलाई करिब १० मिटर परसम्म घिसारेको प्रत्यक्षदर्शीहरूको भनाई रहेको छ । 
घटनामा थप दुई जना घाइते भएका छन् । घाईते हुनेमा आलिताल वडा नं. ४ बस्ने १८ बर्षिय दिपक बोहरा र आलिताल ६ बस्ने ६३ बर्षिया मैना कामीको रहेका छन् । घाईते दुबै जनाको दाहिने हातमा चोट रहेको जोगबुडा अस्पतालले बताएअनुसार जिल्ला प्रहरी कार्यालय डडेल्धुराले जनाएको छ । घाइतेहरूको जोगबुडा अस्पतालमा उपचार भईरहेको प्रहरी स्रोतले जानकारी दिएको छ । अटो चालक भने अहिले फरार रहेका छन् । घटनाको थप अनुसन्धान भइरहेको प्रहरीको भनाइ छ । अटोमा चालक सहित ६ जना सवार रहेका थिए ।