मेगा बचत तथा ऋण सहकारीको १३औं बार्षिक साधारण सभा सम्पन्न

महेन्द्रनगर – मेगा बचत तथा ऋण सहकारी संस्थाको १३औं बार्षिक साधारण सभा सम्पन्न भएको छ । आइतबार संस्थाको महेन्द्रनगर सेवा केन्द्र र दैजी सेवा केन्द्रको संयुक्त रुपमा संस्थाका अध्यक्ष रघुनाथ ओझाको अध्यक्षता एबं जेष्ठ शेयर सदस्य हिरा देवी जोशीको प्रमुख आतिथ्यतामा १३औं साधारण सभा सम्पन्न गरिएको हो । ब्रह्मदेव, दोधारा सेवा केन्द्रको बुधबार र धनगढी, बेलौरी सेवाकेन्द्रको साधारण सभा शनिबार सम्पन्न गरिएको थियो ।

साधारण सभामा बार्षिक प्रगति प्रतिवेदन संस्थाका अध्यक्ष रघुनाथ ओझाले प्रस्तुत गरेका छन् । उनले प्रस्तुत गरेको प्रतिवेदन अनुसार संस्थाको शेयर पूँजी ४१ लाख ६१ हजार एक सय रुपैयाँले बढेर ७ करोड ३७ लाख ८३ हजार एक सय रुपैयाँ पुगेको छ । सहकारीको संस्थागत पूँजी ५ करोड ३९ हजार ६ सय ३७ रुपैयाँ रहेको छ । निक्षेपमा पनि सहकारीले प्रगति गरेको देखिएको छ । प्रतिवेदनमा अघिल्लो वर्षको निक्षेपभन्दा झण्डै ५ करोड बढी निक्षेप संकलन गरेको देखिएको छ । अघिल्लो वर्ष ४२ करोड ८३ लाख ७४ हजार ७ सय ३ रुपया निक्षेप रहेकोमा गत वर्षमा संस्थाले ४७ करोड ३८ लाख ९८ हजार ७१ रुपया निक्षेप संकलन गरेको छ ।
गत आर्थिक वर्षको असार मसान्तसम्म ७५ करोड ९४ लाख ७६ हजार ९ सय ७१ रुपया बराबरको सम्पत्ति रहेको मेगा सहकारीले ७२ लाख ६५ हजार ९ सय ३३ रुपया खुद नाफा आर्जन गरेको छ ।

सदस्य सँग छरिएर रहेको सानोतिनो पूँजीलाई एकितृत गरी पूँजीको अभाव भएका इच्छुक सदस्यलाई ऋण प्रदान गरी उद्यमशीलता मार्फत सदस्यको जीवनस्तर माथि उकास्ने उद्देश्यले सहित सहकारीले काम गरिरहेको अध्यक्ष ओझाले बताए ।

जेष्ठ शेयर सदस्य केशव दत्त जोशीले आम्दानीसँगै दैनिक रुपमा बचत गर्नु पर्ने कुरामा जोड दिए । उनले बढीभन्दा बढी बचत गर्ने बानी बसाल्नु पर्छ बताउँदै सहकारीको उत्तरोत्तर प्रगतीको कामना गरे ।

सभामा शेयर सदस्य सुनपाती मार्कण, धन बहादुर देउवा, कलावती देवी साउद लगायतले शुभकामना मन्तव्य राखेका थिए । सहकारीले बचतकर्ताको सानो सानो बचतलाई सही र सुरक्षित ठाउँमा लगानी गर्दै र विश्वसनीय सेवा दिँदै आएको र अझै विश्वसनीय सेवा दिने अपेक्षासहित उनीहरूले शुभकामना मन्तव्य राखे ।

साधारण सभामा उत्कृष्ठ बचतकर्ता, ऋणी, समूहलगायतलाई सम्मान तथा प्रमाण पत्र प्रदान गरिएको छ । सभामा साधना कला केन्द्रका कलाकारहरूले नृत्य देखाएका थिए ।
२०७१ सालमा २५ जना शेयर सदस्यको ५२ हजार शेयर पूँजीबाट सुरु गरिएको सहकारीको हाल ८७ करोड शेयर पूँजी पुगेको छ । १३ औं साधारण सभाबाट १ हजार शेयर सदस्य वृद्धि गर्ने लक्ष राखेको छ ।

विगत पाँच वर्षदेखि महिला शेयर सदस्यलाई महिनाको तीन सय र दसैँ खर्च बापत एक हजार रुपैयाँ प्रदान गर्दै आएको संस्थामा ३ हजार ३ सय ८२ महिला र ३ हजार ५ सय ३१ पुरुष गरी कुल ६ हजार ९ सय १३ शेयर सदस्य रहेका छन् ।
मेगा बचत तथा ऋण सहकारी राष्टिय सहकारी बैंकद्वारा दुई पटक शाखा स्तरीय उत्कृष्ट कारोबार पुरुस्कार र एक पटक प्रदेश स्तरीय उत्कृष्ट पुरस्कारबाट सम्मानित भइसकेको छ । त्यसैगरी भीमदत्त नगरपालिकाले उत्कृष्ट संस्था २०८१ बाट समेत संस्था सम्मानित भइसकेको छ ।

भिडियो सहित हेर्नुहोस्

साधारण सभामा सहकारीका शेयर सदस्य, बचतकर्ता, सञ्चालक समितिका पदाधिकारी, सदस्य तथा विभिन्न उपसमिति संयोजक तथा सदस्य र कर्मचारीको सहभागिता रहेको कार्यक्रमको सञ्चालन सहकारीका कार्यकारी प्रमुख सुनिल सेटीले सञ्चालन गरेका थिए ।