नयाँ खबर
महेन्द्रनगर – कञ्चनपुरको बेलौरीस्थित उग्रतारा बाल विद्यालय कक्षा १० मा अध्ययनरत विद्यार्थी स्वर्णीमा कँडेल संयुक्त राष्ट्र संघको ८१औँ महासभासँग सम्बन्धित कार्यक्रममा सहभागी हुदैछन् । युनिसेफ नेपालकी युवा अधिवक्तासमेत रहेकी कँडेलले बाल अधिकार, किशोरी सशक्तीकरण तथा युवाका सवालमा अन्तर्राष्ट्रिय मञ्चमा आफ्ना विचार प्रस्तुत गर्ने अवसर पाएसंगै उनी आज शुक्रबार अमेरीका प्रस्थान गर्दैछन् । संयुक्त राष्ट्र संघको ८१औँ महासभा सन् २०२६ सेप्टेम्बर २१ देखि २५ सम्म अमेरिकाको न्यूयोर्कमा आयोजना हुँदैछ । महासभासँग सम्बन्धित ‘युनाइटेड नेसन्स विक’ का विभिन्न कार्यक्रममा कँडेलले युनिसेफ नेपालको युवा अधिवक्ताका रूपमा सहभागिता जनाउनेछिन् ।
बाल अधिकारको प्रवर्द्धन, किशोरी सशक्तीकरण तथा युनिसेफका कार्यक्रम र पैरवीसम्बन्धी गतिविधिमा सक्रिय सहभागिता र प्रतिबद्धताका आधारमा कँडेललाई अन्तर्राष्ट्रिय कार्यक्रममा सहभागी हुने अवसर प्राप्त भएको हो ।
न्यूयोर्कमा रहँदा उनले विश्वका विभिन्न देशका युवासँग छलफल तथा अन्तरक्रियामा सहभागी हुनुका साथै विभिन्न साइड इभेन्टमा नेपालको तर्फबाट आफ्ना अनुभव, विचार र दृष्टिकोण प्रस्तुत गर्नेछिन् ।
उग्रतारा बाल विद्यालयले बिहीबार विशेष कार्यक्रम आयोजना गरी सफल यात्रा तथा प्रभावकारी सहभागिताका लागि शुभकामनासहित विदाई गरेको छ । कार्यक्रममा विद्यालयका प्रधानाध्यापक केशव सिंह बिष्टले स्वर्णीमाको अन्तर्राष्ट्रियस्तरको सहभागिता विद्यालयका लागि गौरवको विषय भएको बताए । उनले स्वर्णीमाले विद्यालयसँगै बेलौरी र कञ्चनपुरको नाम अन्तर्राष्ट्रिय मञ्चमा चिनाउन योगदान पुर्याउने विश्वास व्यक्त गरे ।
उग्रतारा बाल विद्यालयकी छात्रा स्वर्णीमाको यो अन्तर्राष्ट्रिय सहभागिताले विद्यालय, बेलौरी र सुदूरपश्चिमका विद्यार्थीलाई आफ्नो प्रतिभा, क्षमता र आवाजलाई राष्ट्रिय तथा अन्तर्राष्ट्रिय मञ्चसम्म पुर्याउन प्रेरणा दिने अपेक्षा गरिएको छ ।
परशुराम मिडिया प्रालि.द्धारा सञ्चालित नयाँ खवर डटकमले समाचार, विचार, मनोरन्जन, खेल, विश्व, सुचना प्रविधि, भिडियो तथा जीवनका बिभिन्न आयामका समाचार र विश्लेषण समेट्छ । मर्यादित समाज विकास र उन्नतीको पथमा अगाडी बढ्ने उदेश्यका साथ आवाज बिहीनहरुको आवाज बनेर बाहिर प्रस्फुटन हुन नसकेको सत्य तथ्य, निष्पक्ष समाचार संप्रेषण गर्न सधै प्रतिबद्धछौ । भ्रस्टाचार, अनियमितता सम्बन्धी कुनै अडियो भिडियो तपाई संग छ भने हामीलाई उपलब्ध गराउनुहोस र जिम्मेवार नागरिकको दायित्व पुरा गर्नुहोला, श्रोत गोप्य राखिने छ ।
